नारायणकाजीको दाबी : सरकारको नेतृत्व गछौँ, तर कति र कसरी भन्ने गठबन्धनमा सहमति हुन्छ

काठमाडौं । नेकपा माओवादीका वरिष्ठ उपाध्यक्ष नारायणकाजी श्रेष्ठले आफ्नो पार्टीले सरकारको नेतृत्व गर्ने दाबी गरेका छन् । माओवादी गोरखा-काठमाडौं सम्पर्क मञ्चको प्रशिक्षण कार्यक्रमलाई सम्बोधन गर्दै प्रत्यक्षमा गठबन्धनका आधिकारिक र समानुपातिकमा आफ्ना पार्टीका उम्मेदवारलाई जिताउन आह्वान गरे ।

उनले भने, ‘हामीले सरकारको नेतृत्व गछौँ। तर, कति र कसरी हुन्छ गठबन्धनमा सहमति गरेर गछौँ । हामीले सामाजिक र आर्थिक रुपमान्तरणमा नेतृत्वदायी भूमिका खेल्छौँ ।’

उनले पार्टी अध्यक्ष पुष्पकमल दाहाल प्रचण्डको नेतृत्वमा पार्टी पुनर्गठन गर्ने दाबी गरे । पार्टी रुपान्तरण र पुनर्गठन गरेर सामाजिक न्यायसहितको समृद्धिको लक्ष्य पूरा गर्ने बताए । समाजवादी क्रान्ति हाक्नसक्ने सबै क्रान्तिकारीलाई समेटेर जाने उद्घोष गरे ।

उनले शान्ति प्रक्रियालाई पुरा गर्दै नयाँ नेपाल बनाउने खाका पुरा गर्नेसमेत बताए । अहिलेसम्मको उपलब्धिको रक्षाका लागि सत्ता गठबन्धनका उम्मेदवारलाई जिताउनुपर्ने बताए ।