पोखरामा हुने अन्तर्राष्ट्रिय तेक्वान्दो प्रतियोगिताका लागि १ हजार खेलाडीले नाम दर्ता गरे

पोखरा । पोखरामा यही असोज ६ गतेदेखि ९ गतेसम्म माउण्ट एभरेष्ट अन्तर्राष्ट्रिय तेक्वान्दो प्रतियोगिता हुँदै छ ।

हालसम्म १ हजार भन्दा बढी खेलाडीले नाम दर्ता गराइसकेका आयोजकले जनाएको छ । प्रतियोगितामा क्योरोगीतर्फ ८ सय ११ र पुम्सेतर्फ २ सय भन्दा बढीले आफ्नो नाम टिपाएका गण्डकी प्रदेश तेक्वान्दो संघका अध्यक्ष जगन बहादुर गुरुङले जानकारी दिए ।

दक्षिण एशियामा नै पहिलो पटक उक्त प्रतियोगिता नेपालमा आयोजना गर्न लागिएको हो । प्रतियोगितामा १ दर्जनभन्दा बढी देशका खेलाडीले सहभागिको दर्ता गराइसकेको उनले बताए ।

‘१ हजार ५ सय खेलाडी पोखरा आउने अपेक्षा गरेका छौं । यसले कोभिडका कारण समस्यामा रहेको पर्यटन क्षेत्रलाई उकास्न टेवा पुग्छ,’ उनले भने, ‘जतिसक्दो धेरै खेलाडी सहभागी गराउने प्रयास गरेका छौं ।’

प्रतियोगितामा विश्वभरीका खेलाडी, निर्णायक तथा प्रशिक्षक, सहभागी खेलाडीका परिवारका सदस्यहरू र तेक्वान्दो महासंघका विशिष्ट पदाधिकारीसहित २ हजार भन्दा बढीको उपस्थिति रहने बताइएको छ । सोही प्रतियोगिता यसअघि काठमाडौंमा आयोजना गरिएको थियो । कोभिडका कारण लगातार २ वर्ष प्रतियोगिता हुन सकेन ।

प्रतियोगितामा सिनियर र जुनियरतर्फको क्योरोगीतर्फ महिला र पुरुष गरी विभिन्न ८ वटा तौल समुहमा कुल १६ वटा तौलमा तथा पुम्सेतर्फ समेत १४ देखि ६० वर्ष भन्दा माथी एकल, जोडी र समुहमा प्रतिष्पर्धा हुने आयोजक समितिका सदस्य एवम् ओलम्पियन दिपक विष्टले जानकारी दिए ।

विश्व तेक्वान्दो महासंघले नेपालमा तेक्वान्दो खेलको विकासका साथै नेपाल र पोखराको खेल पर्यटन प्रवद्र्धन गर्न प्रतियोगिता स्विकृती प्रदान गरेको आयोजकले जनाएको छ । प्रतियोगिता पूरा गर्न २ करोड ५५ लाख खर्च लाग्ने अनुमान छ ।