हर्के हल्दार नयाँ टेलिचलचित्र ‘रिटार हल्दार’ मार्फत देखिने

काठमाडौ‌ । हर्के हल्दारको उपनामले परिचित कलाकार विष्णु सापकोटा अब नयाँ टेलिचलचित्र मार्फत देखिने भएका छन् । सापकोटाको मुख्य भूमिका रहने हाँस्य टेलिचलचित्र ‘रिटार हल्दार’ को बारेमा आज एक पत्रकार भेटघाट गर्दै सिरियलको बारेमा जानकारी गराईएको हो ।

भद्र भुजेलको निर्देशनमा बनेको टेलिचलचित्रमा विष्णुको साथमा स्वीकृति खरेल, लक्ष्मी तिमल्सिना, शिव शर्मा, पिताम्बर आचार्य, गीता ओली, प्रेम खतिवडा, रक्षा सापकोटा, यसोदा सापकोटा, लक्ष्मण नेपाल, सुरेश चौधरी, प्रज्ञासी थापा, सानु तिमल्सिना लगायतका कलाकारको अभिनय रहने छ।

प्रमुख अतिथि निर शाहको हातबाट टेलिचलचित्रको पोस्टर सार्वजनिक भएको थियो । कार्यक्रममा मिटिभीका कार्यकारी निर्देशक रोशन पौडेल, कलाकार तथा निर्देशक निर शाह, जितु नेपाल, दमन रुपाखेती, लय संग्रौला, उत्तम केसी, मुकुन्द किशोर भट्टराई, सुरेन्द्र केसी, शैलेन्द्र सिम्खडा लगायतको उपस्थिति रहेको थियो ।

हाँस्य टेलिचलचित्र ‘रिटार हल्दार’ मा श्रीमती नभएको बुढाको कुण्ठा र आफ्नी श्रीमतीलाइ शंका गर्ने बुढाको क्यारेक्टरलाइ विशेष रुपमा प्रस्तुत गरिएको विष्णु सापकोटाले बताए ।

गौतमराज खड्काको ग्राफिक्स, राज कार्कीको सम्पादन, विष्णु सापकोटाको कन्सेप्ट तथा स्क्रिप्ट, प्रवेश पोखरेलको छायाँकन रहेको टेलिचलचित्र प्रत्येक सोमवार सांझ ८ बजे मिटिभीबाट प्रशारण हुनेछ ।