‘बहुबली’ मा राज मातालाई स्वर दिएकी कलाकारले ‘प्रेम गीत ३’ मा पनि स्वर दिँदै (भिडिओ)

काठमाडौं । नायक प्रदीप खड्का र क्रिस्टिना गुरुङ स्टारर पहिलो इन्डो–नेपाली चलचित्र ‘प्रेम गीत ३’ को हिन्दी संस्करणमा डब भइरहेको भिडियो अहिले सामाजिक सञ्जाल र टिकटकमा भाइरल भइरहेको छ।

चलचित्र नेपाल र हिन्दी भाषासहित भारतमा एकैसाथ (भारतमा सेप्टेम्बर २३, २०२२ र नेपालमा यहीँ असोज ७ गते) रिलिज हुने भएपछि सो चलचित्रले अहिले एक किसिमको छुट्टै हाईप्स बटुलिरहेको छ। मुम्बईका विभिन्न सहरहरूमा राखिएका होर्डिङ्स बोर्डहरूले यो चलचित्रको सान झनै बढाएको छ।

भाइरल भएका उक्त भिडियोहरूमा भारतका चर्चित भ्वाइसओभर आर्टिस्टहरुले ‘प्रेम गीत ३’मा अभिनीत भिन्न पात्रहरूको लागी आफ्नो स्वर दिइरहेको देख्न सकिन्छ। बक्स अफिसमा तहल्का मच्चाएको चलचित्र ‘बहुबली’ मा राज मातालाई स्वर दिएकी चर्चित भ्वाइसओभर आर्टिस्ट सविना मलिक मौसमले पनि सो चलचित्रमा आफ्नो स्वर भरेकी छिन् ।

चलचित्रको मुख्य पात्र गीतको लागी स्वर दिइरहेकी आर्टिस्ट पूजा पन्जाबीले आफूले गीतको लागी डब गर्न पाएकोमा अत्यन्तै खुसी लागेको र दर्शकको नजरमा हेर्नुपर्दा पनि चलचित्र आफूलाई अत्यन्तै मन परेको बताइन् ।

उनी भन्छिन्, ‘यो मेरो अहिलेसम्मकै सबैभन्दा राम्रो अनुभव हो । फिल्म धेरै राम्रो छ । कलाकारहरूको पर्फमेन्स धेरै राम्रो छ । स्क्रिप्ट, स्क्रिप्टमा भएका अभिव्यक्ति, लाइन र भावनाहरूले मलाई नै छोएको छ ।’

‘बहुबली’ मा राज मातालाई स्वर दिएकी सविनाले यस चलचित्रमा पनि बलियो पात्रको रूपमा प्रस्तुत भएकी माताको लागी आवाज दिएकी छिन् । चलचित्रमा प्रेमको दाइको लागी आवाज डब गरिरहेका चर्चित आर्टिस्ट मनोज पाण्डेले यो आफ्नो पहिलो नेपाली डब चलचित्र भएको र आफूलाई कुनै पनि हिसाबबाट यो नेपाली फिल्म नलागेको बताएका छन् ।

उनी भन्छन्, ‘ जुन हिसाबले यो चलचित्र सुट भएको छ, लाग्दैन कि यो नेपाली चलचित्र हो। कुनै चिजमा कमी नै छैन । एकदमै राम्रो निर्देशन अनि एकदमै राम्रो प्रस्तुति । कलाकारिताको त कुरै नगरौँ। नेपालमा पनि यति राम्रा कलाकारहरू छन् भन्ने मलाई थाहा थिएन।’