भारतमा ‘प्रेमगीत ३’ काे पाेस्टर रिलिज

काठमाडौं । चलचित्र ‘प्रेमगीत ३’ को हिन्दी पोस्टर प्रक्षेपण कार्यक्रम इन्डियामा सम्पन्न भएको छ । पहिलो इन्डो–नेपाली चलचित्र ‘प्रेमगीत ३’ हिन्दी भाषाको डबसहित भारतमा रिलिज हुने भएको हो ।

चलचित्र रिलिज हुने भएपछि भारतमा पोष्टर लन्च ईभेन्ट राखिएको थियो । जसका लागि चलचित्रका नायक प्रदीप खड्का, नायिका क्रिस्टिना गुरुङ र निर्देशक सन्तोष सेन पुगेका थिए ।

पत्रकारले गरेका प्रश्नमा प्रदीपले आफू अभिनित चलचित्र भारतमा रिलिज हुन लागेकोमा आफू हर्षित भएको बताए । निर्देशक सुभाष कालेलाई धन्यवाद दिँदै उनले भने, ‘भारत र नेपालको सिमाना मात्रै खुल्ला होइन, पाहुनालाई स्वागत सत्कार गर्ने मन पनि खुल्ला छ । र मलाई विश्वास छ कि हामीलाई यहाँ स्वागत सँगसँगै यहाँका दर्शकहरुले अथाह माया पनि दिनुहुनेछ । धन्यवाद ।’

भारतीय चलचित्र निर्माता सुभाष काले ‘प्रेमगीत ३’ का निर्माता हुन् । केही दिन अघि मात्र प्रदीप खड्का र क्रिस्टिना गुरुङ अभिनित चलचित्र ‘प्रेमगीत ३’ नेपाल र हिन्दी भाषासहित भारतमा एकसाथ रिलिज हुने खबर सार्वजनिक भएको थियो ।

सो खबरलगत्तै भारतमा ‘प्रेमगीत ३’ को ट्रेलर रिलिज डेट र फिल्म रिलिज डेटसहितको भारतीय संस्करणको पोस्टर निर्माताले साँझा गरेका थिए ।

भारत मात्र नभएर जी–म्युजिक, युएफओ र मधु इन्टटेनमेन्टद्वारा फिल्मलाई विश्वभर रिलिज गराउने तयारी भइरहेको छ भने हल रिलिजको ठिक आठ सातापछि ‘प्रेमगीत ३’ ओटीटी प्लेटफर्म अमेजनमा रिलिज हुनेछ । चलचित्र सेप्टेम्बर २३, २०२२ अर्थात यही असोज ७ गतेबाट भारतका सम्पूर्ण सिनेमाघरहरुमा रिलिज हुनेछ ।