‘कमेडी हब’ कन्ट्रोभर्सी: माफी माग्दै माग्ने बुढाले हटाए विवादित दृष्य

काठमाडौं । टेलिभिजन शो ‘कमेडी हब’ को ट्रेलर विवादित बनेपछि हटाइएको छ ।

आइतबार राति सार्वजनिक गरिएको ट्रेलरमा भगवान् शिवजीलाई मजाक बनाएर धार्मिक आस्थामा चोट पुर्‍याएको भन्दै आलोचना भएको थियो । हास्य कलाकार सीता न्यौपानेले महादेवसँग टिकटक बनाएको भिडिओ ट्रेलरमा राखिएको थियो ।

कार्यक्रमका निर्देशक केदारप्रसाद घिमिरे ‘माग्ने बुढा’ ले माफी माग्दै उक्त दृष्य युट्यूब, टिकटक, फेसबुकबाट हटाएको जानकारी गराएका छन् ।

‘कमेडी हब कार्यक्रमको एक प्रस्तुतिमा आराध्यदेव महादेवलाई लिएर बनाइएको विषय वस्तुप्रति दर्शक तथा शुभचिन्तकज्यूहरूले देखाउनु भएको प्रतिक्रियाप्रति हाम्रो ध्यानाकर्षण भएको छ । अन्जानमै हामीबाट भएको त्रुटिप्रति सम्पूर्ण दर्शकज्युहरू समक्ष हामी क्षमा माग्दछौ ।’ घिमिरेले लेखेका छन् ।