शमिता शेट्टी र राकेश बापटको ब्रेक अप

काठमाडौं ।  बलिउड डिभा शिल्पा शेट्टीकी बहिनी शमिता शेट्टी र राकेश बापटले सौहार्दपूर्ण रूपमा अलग हुने निर्णय गरेका छन् । गत वर्ष मात्र शमिता र राकेशको चर्चित रियालिटी शो ‘बिग बोस ओटीटी’ मा भेट भएको थियो । सोपश्चात् यो जोडीले एक अर्कालाई डेट गरिरहेको खबर औपचारिक रूपमा नै साझा भएको थियो ।

आ–आफ्नो सामाजिक सञ्जालमार्फत यो जोडीले आफूहरू अब सँगै नभएको र छुटिएको खबर सार्वजनिक गरेका हुन् । केही समय अगाडिदेखि नै शमिता र राकेश अलग्गिएको हल्ला चलेता पनि यो जोडीको ब्रेकअपको बारेमा कुनै आधिकारिक पुष्टि भने भएको थिएन । तर मङ्गलवार अन्ततः शमिता र राकेशले मौन तोड्दै सामाजिक सञ्जालमार्फत अलग भएको घोषणा गरेका हुन् ।

ब्रेकअपबारे शमिता लेख्छिन्, ‘मलाई यो स्पष्ट पार्नु जरुरी छ जस्तो लाग्छ। राकेश र म अब सँगै छैनौँ वा भनौँ केहि समय अगाडिदेखि नै साथ छैनौँ। जसरी अगाडि माया गर्दिनुभएको छ त्यसरी नै आउने दिनमा पनि माया गर्दिनुहुन्छ भन्ने आशा छ । सकारात्मकता र नयाँ क्षितिजको लागि सबैलाई माया र कृतज्ञता छ ।’

शमिताले मात्र नभएर राकेशले पनि आफ्नो स्टोरीमा लेखेका छन्, ‘म सबैलाई जानकार गराउन चाहन्छु कि शमिता र म अब सँगै छैनौँ । नियतिले असाधारण परिस्थितिहरूमा पनि हाम्रो बाटो मिलाइदिएको छ । सम्पूर्ण ‘सारा’ परिवारलाई यो साथ र मायाको लागी धन्यवाद दिन चाहन्छु । म सार्वजनिक रूपमा हामी छुटिएको खबर साझा गर्न चाहँदिन थिए तर मलाई लाग्छ कि यो कुरा सबैलाई थाहा हुन जरुरी छ । यो घोषणाले तपाईंहरूको हृदय टुट्ला । तर आशा छ कि तपाईंहरूले आफ्नो मायाको वर्षा जारी राख्नुहुनेछ । तपाईंहरू सबैको सहयोगको अपेक्षा गर्दछु ।’