इण्डियन आइडल प्रशान्त तामाङलाई पुत्रीलाभ

काठमाडौं । इण्डियन आइडल सिजन ३ का विजेता तथा अभिनेता प्रशान्त तामाङ पिता बनेका छन् । आफू पिता बनेको खबर उनले सामाजिक सञ्जालमार्फत सबैलाई जानकारी गराएका हुन् । छोरीको नामसहित उनले सम्पूर्ण शुभचिन्तकहरुलाई अटुट साथ र मायाको लागि धन्यवाद दिएका छन् ।

प्रशान्त र पत्नी मार्था एलीले पहिलो सन्तान छोरीको नाम आरिया राखेका छन् । आरियाको अर्थ पर्सियन भाषामा ‘नयाँ’ र अल्बानियाली भाषामा बहुमूल्य धातु सुन र खजाना भन्ने हुन्छ ।

सबैलाई धन्यवादसहित प्रशान्तले आफ्नो सञ्जालमा सानो स्टाट्स लेख्दै छोरी आरियालाई स्वागत गरेका छन् । उनले लेखेका छन, ‘ मेरी सानी राजकुमारी आरियालाई यस सुन्दर संसारमा स्वागत छ ।’

प्रशान्त र पूर्वएयर होस्टेस मार्थाले तीन वर्षअघि लगनगाँठो कसेका थिए ।