मलाई ह्यारेस गरियो, तर आत्महत्या गर्दिनँ : तनुश्री दत्ता

नेपाल प्रेस

२०७९ साउन ४ गते १९:०२

काठमाडौं । आशिक बनाया आप्ने, चकलेट, ढोलजस्ता चर्चित चलचित्रहरुमा फिचर्ड भईसकेकी नायिका तनुश्री दत्तले आफू उत्पीडनको शिकार भएको र सुसाइड गर्न सोच्नेसम्मको अवस्थामा पुर्‍याएको बताएकी छन् ।

उनले आफ्नो सामाजिक सञ्जालमार्फत लामो नोट साझा गर्दै बलिउड प्रवेश गर्दा पनि आफूलाई टर्चर भएको खुलाइन् ।

बलिउडमा पहिला प्रवेश गर्दा पनि एक वर्षसम्म आफूलाई टर्चर आएको र त्यसको केही समयपश्चात आफूले पिउने पानीमा औषधि र स्टेरोइड मिसाएर गम्भीर स्वास्थ्य समस्याको सामना गर्नुपरेको उनको दाबी छ ।

उनले नोटमा लेखेकी छन्, ‘कृपया कसैले केही गर्नुहोस् । मलाई धेरै नराम्रो तरिकाले उत्पीडनको सिकार बनाइ राखिएको छ । सबैले कान खोलेर सुने हुन्छ म कुनै हालतमा आत्महत्या गर्ने छैन न त मुम्बई छोडेर नै कतै जानेछु । म यहाँ आफ्नो करियरलाई पहिले भन्दा ठूलो उचाइमा पुनरुत्थान गर्न आएकी हुँ ।’

तनुले आफूले पर्दाफास गरेका एनजीओहरु, मीटु अपराधी, बलिउड माफिया तथा महाराष्ट्रको पुरानो राजनीतिक चक्रद्वारा आफू ह्यारेसमेन्टको शिकार भएको बताएकी छन् । पहिलाजस्तै अहिले पनि आफ्नो फ्ल्याट बाहिर शंकास्पद घटनाहरु घट्ने गरेको कुरा उनले नोटमा उल्लेख गरेकी छन् ।

‘मलाई थाहा छ धेरैले मलाई बलिउडबाट खारेज गर्ने प्रयास गरिरहेका छन् । चीजहरू सबै मेरो हातबाट बाहिर जाँदैछन् । यो गम्भीर मानसिक, शारीरिक र मनोवैज्ञानिक उत्पीडन हो । यो कस्तो ठाउँ हो जहाँ केटा र केटीहरूलाई उत्पीडन गरेर मार्ने गरिन्छ । आज म, भोलि तपाईँ र पर्सि जो पनि हुन सक्छ ।’, उनी थप्छिन्, ‘यो सहरमा कुनै कानून र व्यवस्था छैन । म चाहन्छु कि महाराष्ट्रमा राष्ट्रपति शासन र सैन्य शासन स्थापित होस् ।

सन २०१० देखि तनुश्रीले बलिउडबाट अनिश्चितकालीन ब्रेक लिएकी थिइन् । करिब ८ वषै पछाडि सन् २०१८ मा मात्रै उनले बलिउडमा आफ्नो कमब्याक गरेकी थिइन् ।

बलिउड फर्किएपछि तनुश्रीले एक अन्तर्वार्तामा चलचित्र ‘हर्न ओके प्लिज’ को एक गीत सुटिङका क्रममा आफू मीटुको सिकार भएको भन्दै अभिनेता नाना पाटेकरमाथि यौन दुर्व्यवहारको आरोप लगाएकी थिइन् ।