अर्जेन्टिनासँगको पराजयपछि नयाँ खेलाडीलाई अवसर दिएको इटालीले खेल्यो जर्मनीसँग बराबरी
लन्डन। नेसन्स लिग फुटबलको आफ्नो पहिलो खेलमा इटालीले जर्मनीसँग १–१ गोलको बराबरी खेलेको छ।
अर्जेन्टिनासँग ३–० गोलले हारेको केही दिनपछि खेलिएको यस खेलमा इटालीले अधिकांश नयाँ खेलाडीलाई अवसर दिएको थियो।
त्यसअघि युरोपियन च्याम्पियन र कोपा अमेरिका च्याम्पियनबीच भएको भिडन्तमा अर्जेन्टिनाले शानदार जित हात पारेको थियो। इटाली यसै वर्ष कतारमा हुने विश्वकपमा देखिने छैन। महादेशीय छनोटबाटै बाहिरिएको थियो।
घरेलु मैदानमा शनिबार राति भएको खेलमा भने इटालीले युवा र नयाँ खेलाडीसहित जोशिलो प्रदर्शन गरेको थियो। ७० औँ मिनेटमा इटालीका लोरेन्जो पेलग्रिनीले गोल गर्दैं अग्रता दिलाएका थिए।
त्यसका लागि १८ वर्षीय विलफ्राइड नन्टोले पास उपलब्ध गराएका थिए। तर लगत्तै जर्मनीले खेल बराबरीमा ल्याएको थियो। जोसुवा किम्मिचले गोल गरेका थिए। नयाँ प्रशिक्षक हान्सी फ्लिकको प्रशिक्षणमा जर्मनीले १० खेलयता हार व्यहोरेको छैन।