विवेकशीलका संस्थापक नेता पुकार बम काठमाडौं-१ बाट चुनाव लड्ने
काठमाडौं । विवेकशील नेपालीका संस्थापक नेता पुकार बमले काठमाडौंकाे क्षेत्र नं. १ बाट प्रतिनिधिसभा सदस्यका लागि उम्मेदवारी घोषणा गरेका छन् । कैलालीका बासिन्दा उनी सामाजिक अभियन्तासमेत हुन्।
उनले आफ्नो उम्मेदवारी घोषणा गर्दै भने,‘अहिलेसम्म सडकबाट नागरिकका निम्ति सकेको काम गरेँ, अब संसद् पुगेर नागरिकको आवाज बोल्छु ।’
उनी काेराेनाकाे समयमा चलाइएकाे ‘इनफ इज इनफ’ अभियानमा सक्रिय सहभागी थिए । कोरोना महामारीको बेला निशुल्क खाना खुवाउने अभियानकाे अगुवाइ गरेका बम विभिन्न माग राखेर १२ दिन अनसनसमेत बसेका थिए । हाल उनी साेसल वर्कमा विद्याबारिधि गर्दैछन् ।
काठमाडौ- १ कांग्रेस नेता प्रकाशमान सिंहले चुनाव जितेको क्षेत्र हो । अघिल्लो संसदीय चुनावमा यस क्षेत्रबाट विवेकशील साझाका तत्कालिन अध्यक्ष रविन्द्र मिश्र सिंहसित थोरै मतान्तरले हारेका थिए ।