कान्समा अवार्ड जित्न सफल नेपाली निर्देशकलाई प्रियंका चोपडाले दिइन् बधाई

काठमाडौं । युरोपमा आयोजना हुने तीन ठुला फिल्म फेस्टिभल मध्ये कान्स फिल्म फेस्टिभललाई पनि एक मानिन्छ ।

मुलधारका व्यवसायिक चलचित्र भन्दा अलिक फरक ‘फिल्म एज अ आर्ट’ भन्ने भावनालाई प्राथमिकता दिएर चलचित्र निर्माण गर्ने चलचित्रकर्मीहरुको लागि त कान्स महाकुम्भ नै मानिन्छ भने उक्त फेस्टिभलमा अवार्ड जित्न सफल धेरै निर्देशक तथा चलचित्रकर्मीहरुको सो अवार्डबाट विश्वभरनै चर्चा हुने गर्छ ।

कान्स २०२२ मा लघु चलचित्र ‘लोरी’ मार्फत स्पेसल मेन्सन अवार्ड जितेर चर्चाको शिखरमा रहेका त्यस्तै एउटा निर्देशक हुन अविनाशविक्रम शाह । हाल उनको चर्चा यति सम्म चुलिएको छ कि चर्चित बलिउड तथा हलिउड सुपरस्टार प्रियंका चोपडाले उनलाई बधाई दिएकी छिन् ।

प्रियंकाले आफ्नो सामाजिक संजाल इन्स्टाग्राममा शाहको तस्विर सेयर गर्दै बधाई व्यक्त गरेकी हुन् । ‘कान्स २०२२ का सबै विजेतालाई बधाई छ । खासगरी एसियाका प्रतिभाशाली विजेताको जितलाई लिएर मनैदेखि बधाई दिन चाहन्छु ।’ उनले लेखेकी छिन्।

प्रियंकाले शाहसँगै अवार्ड जितेका दक्षिण कोरियाका पार्क चन वुक, अभिनेता सङकाङ हो, इरानी अभिनेत्री जार अमिर इब्राहामी र पटकथा लेखक तारिक सलेहको पनि तस्बिर सेयर गरेकी छिन् ।