भक्तपुरको चाँगुनारायण नपाको प्रमुखमा कांग्रेस र उपप्रमुखमा एमाले विजयी (अन्तिम नतिजासहित)

भक्तपुर । भक्तपुरको चाँगुनारायण नगरपालिकाको प्रमुखमा कांग्रेस र उपप्रमुखमा एमाले विजयी भएको छ ।

गठबन्धनलाई छाडेर एक्लै अघि बढेको कांग्रेसले यहाँ उपमेयर गुमाउनुपर्‍यो । त्यस्तै कांग्रेस २०७४ सालको मंसिरमा भएको प्रदेशसभाको उपनिर्वाचनमा राष्ट्रिय प्रजातन्त्र पार्टीसँग गरिएको लिखित सम्झौतालाई लत्याएर अघि बढेको थियो ।

प्रमुख निर्वाचित कांग्रेसका जीवन खत्रीले ९ हजार ५५० मत ल्याएका छन् । उनका निकटतम प्रतिद्वन्द्वी एमालेकी वीणा बास्तोलाले ९१६० मत ल्याइन् । उनी निवर्तमान उपमेयर थिइन् ।

प्रमुखमा राप्रपाका रवीन्द्रप्रताप शाहले ८ हजार ६७ मत ल्याउँदा नेमकिपा केशवप्रसाद तिमिल्सिनाले ३ हजार २६७ मत पाए ।

उपप्रमुखमा एमालेका रमेश बुढाथोकी ११ हजार १०७ मत ल्याएर निर्वाचित भए । उनका निकटतम प्रतिद्वन्द्वी कांग्रेसकी सुभद्रा काफ्लेले ९ हजार ७६ मत ल्याइन् । उपमेयरमा राप्रपाकी मञ्जु कार्कीले ६०८६ र नेमकिपाकी कल्पना लामाले ३३७४ मत ल्याएका छन् ।

वडामा पनि मिश्रित

चाँगुनारायण नपाका नौ वटा वडामा यसपटक पनि मिश्रित परिणाम आएको छ । अघिल्लो निर्वाचनमा कांग्रेस, एमाले र नेमकिपाको उपस्थिति रहेको वडामा यसपटक राप्रपाले इन्ट्री गरेको छ । राप्रपाले एमालेका दुइटा वडा खोसेको छ ।

कांग्रेसले ४ वडाको अध्यक्ष जित्दा राप्रपा र एमालेले समान २–२ वटा र नेमकिपाले एक वडा जितेका छन् ।

चाँगुनारायण नगरपालिका
प्रमुखः जीवन खत्री (नेपाली कांग्रेस
उपप्रमुखः रमेश बुढाथोकी (एमाले)
वडा नं १ः सिजन कार्की (कांग्रेस)
वडा नं २ः सोम प्रधान (कांग्रेस)
वडा नं ३ः श्यामसुन्दर धिमाल (एमाले)
वडा नं ४ः रोजबहादुर लामा (एमाले)
वडा नं ५ः जयन्द्र खड्का (कांग्रेस)
वडा नं ६ः धनबहादुर लामा (राप्रपा)
वडा नं ७ः श्याम नायजू श्रेष्ठ (राप्रपा)
वडा नं ८ः जनक खत्री (कांग्रेस)
वडा नं ९ः गणेश त्यात (नेमकिपा)