ट्याक्सी व्यवसायीले बायोडाटामा प्राध्यापक लेखेपछि पोखरा कांग्रेसमा विवाद

पोखरा । नेपाली कांग्रेसबाट पोखरा महानगरपालिका वडा नम्बर १६ को वडाध्यक्ष बन्न एकजना उम्मेदवारका प्रत्यासीले झूटो विवरण पेश गरेपछि विवाद भएको छ ।

ट्याक्सी व्यवसायी वडा कार्य समितिका सभापति अमृत शर्मा तिमिल्सिनाले वडाबाट जिल्लामा नाम सिफारिस गर्दा आफूलाई प्राध्यापक भनेर लेखेको कागज बाहिरिएसँगै अन्य प्रत्यासीले विरोध गरेका हुन् ।

सो वडाबाट अध्यक्षका लागि प्रदेशसभा उपसभापति होमबहादुर बानियाँ, महाधिवेशन प्रतिनिधि तथा सामाजिक अभियन्ता मदन बस्नेतसहित ५ जनाको नाम आकांक्षीका रुपमा सिफारिस भएको थियो ।

झूटो विवरण पेश गरेर टिकट हत्याउन खोजेको भन्दै अन्य आकांक्षीले नगर सभापति सुरेन्द्र बिजुक्छेसमक्ष विरोध जनाएपछि उनले झूटा विवरण पठाउनु गलत भएकाले तत्काल एक्सन लिने बताएका छन् ।