मेलिनाको ‘मन मनै त हो’ मा अमिका र ध्रुव

काठमाडौं । लन्डनका चर्चित युवा निर्देशक कुशल श्रेष्ठको छायांकन, सम्पादन र निर्देशनमा नयाँ रोमाञ्चक म्युजिक भिडियो सार्वजनिक भएको छ ।

लन्डन प्लमस्टिडस्थित गोर्खा क्लबमा एक कार्यक्रमका बीच अमिका महत क्षेत्रीको मन मनै त हो भिडियो सार्वजनिक गरिएको हो । म्युजिक भिडियो दुई कन्या काव्या श्रेष्ठ र वृष्टि पुन श्रेष्ठले सार्वजनिक गरेका थिए ।

अर्जुन रत्न भिखारीको शब्द, सुनील मास्केको संगीत, मेलिना राईको स्वर रहेको गीतमा लन्डनका विभिन्न रमणीय दृश्य समेटेर भिडियो बनाइएको छ । म्युजिक भिडियोमा लन्डनवासी नायक ध्रुव दत्त र अमिका महतले अभिनय गरेका छन् । मिसेस नेपाल यूकेमा सहभागी अमिकाको यो डेब्यु प्रोजेक्ट हो ।

म्युजिक भिडियो सार्वजनिक कार्यक्रममा कलाकारहरू ध्रुव दत्त र अमिका क्षेत्रीले आ–आप्mनो अनुभव सुनाएका थिए। उनीहरूले कुशलको निर्देशकीय क्षमतामा काम गर्न निकै सहज भएको बताए । पहिलोपटक म्युजिक भिडियोमा अभिनय गरेकी अमिका चर्चित नाट्यकर्मी स्वर्गीय जितेन्द्र महत अभिलाषीकी पुत्री हुन् ।

कार्यक्रमका वक्ताहरूले बेलायतमा सीमित श्रोत र साधनका बीच पनि म्युजिक भिडियो निरन्तर आइरहनु नेपाली गीत–संगीत र श्रष्टाका लागि सकारात्मक पक्ष भएको धारणा राखेका थिए । कार्यक्रममा इनास यूकेले कलाकारलाई सम्मान गरेको थियो ।