गीतकार दर्पण राईविरुद्ध ४८ लाखको ठगी उजुरी

काठमाडौं । चर्चित गीतकार दर्पण राईविरुद्ध ठगीको उजुरी परेको छ । स्रोतका अनुसार दुई जनाले उनी विरुद्ध ४८ लाख रुपैयाँको चेक बाउन्सको ठगी उजुरी दर्ता गरेका छन् । दुवै उजुरी महानगरीय प्रहरी वृत्त, महाराजगन्जमा दर्ता भएका छन् ।

वृत्तका एक अधिकारीका अनुसार बर्सु गुरुङले पाँच महिनाअघि १३ लाख रुपैयाँको चेक बाउन्स र छेवाङ लामाले डेढ महिनाअगाडि ३५ लाख रुपैयाँको चेक बाउन्सको उजुरी दिएका हुन् । राईले दिएको चेक नसाटिएपछि दुवै जना पीडित प्रहरीकहाँ पुगेका थिए । बैङ्कले पर्याप्त रकम नरहेको भन्दै चेक बाउन्स गरेको थियो ।

पीडितका अनुसार राईले अन्य केहीलाई पनि ठगी गरेर हिँडेका छन् । उनीहरू पनि उजुरी गर्ने तयारीमा रहेका छन् ।

उजुरीबारे बुझ्दा राईले नेपाल प्रेससँग भने, ‘कारोबार गरियो, मैले गरेकै हो । तर, खाएरै हिँड्ने भन्ने होइन । ढिलो छिटो भएको मात्रै हो । केही समयका लागि मैले माफ माग्दै आएको हो । मैले म्यानेज गरिरहेकै थिए । तर, उहाँहरूले उजुरी हाल्नुभएछ ।’

राईको ‘तिम्ले बाटो फेर्‍यौ अरे’ भाग एक र भाग दुई गीत चर्चित छन् ।