नेकपा एसको ठहर- आगामी चुनाव केपी ओली र गठबन्धनबीच हुँदैछ (प्रतिवेदनसहित)

काठमाडौं । सत्तारुढ नेकपा एकीकृत समाजवादीले मुलुक अहिले नेकपा एमालेका अध्यक्ष केपी ओली र पाँच दलीय गठबन्धनका रूपमा दुई धारमा विभाजित रहेको भन्दै ओलीविरुद्ध सबै शक्ति एकजुट हुनुपर्नेमा जोड दिएको छ ।

बुधवार सुरू भएको नेकपा एसको केन्द्रीय कमिटी बैठकमा अध्यक्ष माधवकुमार नेपालले पेस गरेको राजनीतिक प्रतिवेदनमा गठबन्धन भत्काउन र पुनः शक्तिमा फर्किन केपी ओलीले षड्यन्त्र गरिरहेको आरोप लगाइएको छ ।

नेपालले राजनीतिक प्रतिवेदनमा भनेका छन्, ‘मुलुक यतिबेला राजनीतिकरूपले मुलतः दुई धारमा विभाजित छ । एउटा व्यक्तिवादी, स्वेच्छाचारी, अलोकतान्त्रिक र असहिष्णु प्रवृति बोकेको दक्षिणपन्थी अवसरवादी धार र अर्को संविधानको पूर्णकार्यान्वयन गर्दै त्यसले निर्देश गरे अनुरूप मुलुकलाई समाजवादको दिशामा अगाडि बढाउन चाहने वाम लोकतान्त्रिक धार । अघिल्लो प्रवृत्तिको मूल बाहक केपी ओली हुन् भने वाम लोकतान्त्रिक धारका अगुवा पाँच दलीय गठबन्धनमा रहेका राजनीतिक दलहरू हुन् । …यस गठबन्धन र सहकार्यलाई कम्तीमा पनि आगामी स्थानीय तहको निर्वाचनसम्ममात्र होइन प्रतिनिधिसभा र प्रदेशसभाको निर्वाचनसम्म पनि कायम राख्नुपर्ने आवश्यकता छ ।’

प्रतिवेदनमा अध्यक्ष नेपालले आगामी निर्वाचनमा सत्ता गठबन्धन बनाउनैपर्ने बताएका छन् । प्रतिवेदनबाट आगामी चैत १५ भित्र सम्पूर्ण पालिका र वडाहरूमा पार्टी कमिटी गठन गरिसक्ने कार्ययोजना पेस गरिएको छ ।

त्यस्तै सबै कमिटी र जनसंगठनहरूलाई आर्थिक संकलनको कार्य तीब्र बनाउन निर्देशन दिइएको छ । अध्यक्ष नेपालको राजनीतिक प्रतिवेदनमाथि छलफल गर्न ९ समूह गठन भएको पोलिटब्यूरो सदस्य दिलु पन्तले जानकारी दिइन् ।

जसका लागि ७ प्रदेशको ७ समूह तथा उपत्यका विशेष र सम्पर्क समन्वयको एउटा र केन्द्रीय विभाग तथा मोर्चा संगठनको अर्को समूह गरी ९ समुहमा विहीबार बिहानसम्म छलफल हुने र त्यसमा अध्यक्षले जवाफ दिएपछि पारित हुने उनको भनाइ छ ।

हेर्नुस् बैठकमा अध्यक्ष नेपालले पेस गेको राजनीतिक प्रतिवेदन :