टी-२० विश्वकप छनोटमा नेपाल तेस्रो, कुशलको पाचौँ अर्धसतक

काठमाडौं । नेपाली क्रिकेट टोलीका प्रारम्भिक ब्याट्सम्यान कुशल भुर्तेलले टी-२० अन्तर्राष्ट्रिय क्रिकेटमा पाचौँ अर्धसतक बनाएका छन्।

भुर्तेलको शानदार पालीमा नेपालले बिहीबार घरेलु टोली ओमानलाई ९ हराएर आईसिसी टी-२० विश्वकप छनोटमा तेस्रो स्थान हात पारेको छ। नेपालले १६ ओभर २ बलमा एक विकेट गुमाएर लक्ष्य पुरा गर्‍यो।

कुशल ५५ रनमा अविजित रहे। उनले ११ टी-२० अन्तर्राष्ट्रिय खेलमा एक सतक र ५ अर्धसतक बनाएका छन्। आरिफ शेख पनि २१ रनमा अविजित रहे । त्यसअघि टस जितेर पहिला ब्याटिङ रोजेको ओमान ८७ रनमा सिमित भएको थियो। ओमानले निर्धारित २० ओभरमा ९ विकेट गुमाएर मात्र ८७ रन जोड्न सक्यो।

नेपालका सन्दीप लामिछानेले ३, अविनाश बोहरा, आरिफ शेख, सागर ढकाल र कमलसिंह ऐरीले एक-एक विकेट लिए। सन्दीपले चार ओभरमा १३ रन खर्चिए।

सेमिफाइनलमा पराजित भएका दुवै टोली तेस्रो स्थानका लागि भिडेका हुन्। अन्तिम चारमा नेपालले यूएई र ओमानले आयरल्यान्डसँग हार ब्यहोरेपछि विश्वकपमा छनोट हुन असफल भएका थिए।

नेपालले टी-२० अन्तर्राष्ट्रिय क्रिकेटमा पाचौँपटक ९ विकेटको जित हात पारेको हो। हालसम्म १० विकेटले भने विजयी हुन सकेको छैन।