कुशलको पाचौँ टी-२० अन्तर्राष्ट्रिय अर्धसतक
काठमाडौं । नेपाली क्रिकेट टोलीका प्रारम्भिक ब्याट्सम्यान कुशल भुर्तेलले टी-२० अन्तर्राष्ट्रिय क्रिकेटमा पाचौँ अर्धसतक बनाएका छन्।
ओमानमा जारी आईसिसी टी-२० विश्वकप क्रिकेट छनोटअन्तर्गत तेस्रो स्थानका लागि भइरहेको खेलमा नेपालले ओमानविरुद्ध ८८ रनको लक्ष्य पछ्याइरहेका बेला भुर्तेल ५० रनमा खेल्दैछन्।
कुशलले ११ टी-२० अन्तर्राष्ट्रिय खेलमा एक सतक र ५ अर्धसतक बनाएका छन्। नेपालले १३ ओभरमा एक विकेट गुमाएर ७५ रन जोडेको छ।
टस जितेर पहिला ब्याटिङ रोजेको ओमान ८७ रनमा सिमित भएको थियो। ओमानले निर्धारित २० ओभरमा ९ विकेट गुमाएर मात्र ८७ रन जोड्न सक्यो।
नेपालका सन्दीप लामिछानेले ३, अविनाश बोहरा, आरिफ शेख, सागर ढकाल र कमलसिंह ऐरीले एक-एक विकेट लिए। सन्दीपले चार ओभरमा १३ रन खर्चिए।
सेमिफाइनलमा पराजित भएका दुवै टोली तेस्रो स्थानका लागि भिडेका हुन्। अन्तिम चारमा नेपालले यूएई र ओमानले आयरल्यान्डसँग हार ब्यहोरेपछि विश्वकपमा छनोट हुन असफल भएका थिए।