अञ्जु पन्त अर्को महिना श्रीमानसहित नेपाल फर्किने

काठमाडौं । श्रीमानसहित अमेरिका पुगेकी गायिका अञ्जु पन्त अर्को महिना नेपाल फर्किने भएकी छन् । अमेरिकामै भासिन लागेको आशंका चिर्दै उनले नेपाल फर्किने तयारी गरेकी हुन् ।

अञ्जुका श्रीमान थिर कोइरालाले स्थाई बसोबास गर्ने हिसाबले आफूहरु अमेरिका नआएको बताए । नेपाल प्रेससँग कुरा गर्दै उनले केही काम सकेर अर्को महिनासम्ममा स्वदेश फर्किने जानकारी दिए ।

‘मेरो यहाँ सानो काम थियो, कोभिडका कारण ढिलाइ भयो,’ उनले भने, ‘यो सक्नासाथ दुवैजना फर्किन्छौं ।’ नेपाल फर्केर दुवैजना पहिलेकै पेशामा सक्रिय हुने उनले बताए । कोइराला नेपाल छँदा मिकाह नेपाल नामक गैरसरकारी संस्थामा राष्ट्रिय संयोजकका रुपमा कार्यरत थिए ।

कोइरालाले भने, ‘मेरो जब नेपालमै छ । यता बस्ने प्रश्नै आउँदैन ।’ इलाम घर भएका सञ्चारकर्मी तथा गीतकार थिरले २०७७ साल फागुन १२ गते अञ्जुसँग क्रिश्चियन परम्पराअनुसार विवाह गरेका थिए । उनीहरु ६ महिनाअगाडि अमेरिका गएका हुन् ।

अञ्जुले गाएको ‘न बिर्सेँ तिमीलाई’ बोलको गीत हालै रचना रिमालको स्वरमा रिरेकर्ड भएर आएपछि चर्चा र विवाद जारी छ । अञ्जु स्वयम्ले पनि यस विषयमा असन्तुष्टि जनाउँदै फेसबुकमा स्टाटस लेखेकी थिइन् ।