प्रमोद र रुक्सनाको गीत ‘नोगेन’ विवादमा : आफ्नो सिर्जनाबाट चोरिएको संगीतकार सापकोटाको आरोप

काठमाडौं । बालगायिका रुक्सना लिम्बु र गायक प्रमोद खरेलद्वारा स्वरबद्ध गीत ‘नोगेन’ विवादमा तानिएको छ ।

चर्चित संगीतकार बसन्त सापकोटाले उक्त गीतको केही अंश आफूद्वारा संगीतबद्ध एक गीतबाट चोरी गरिएको आरोप लगाएका छन् ।

सन् २०६६ मा रिलिज भएको फिल्म ‘सिलसिला’मा समावेश गीत ‘सागरसरी चोखो माया’बाट उक्त गीतको केही अंश कपि गरिएको सापकोटाले नेपाल प्रेसलाई बताए ।

‘नोगेन गीतको हुक पार्ट मेरो रचनासँग दुरुस्तै मिलेको छ । पाँचपटक दोहोरिएको छ । टीकटक र सामाजिक सञ्जालमै पनि यही क्लिपलाई सेयर गरिएको छ’ सापकोटाले भने ।

‘अपलोड गर्नुअघि एकपटक सोधेको भए हुन्थ्यो । अब हटाउन पनि नमिल्ला तर, संयुक्त नाम राख्नुपर्छ भन्ने मेरो माग हो’ उनी भन्छन्, ‘यसबारे संगीतकार महेश खड्काजीसँग पनि कुरा गरेको छु । गीत मिल्यो भनेर मैले भनेको होइन, पब्लिकबाट पनि आएको छ ।’

आफूलाई उक्त गीतले देश विदेशमा समेत चिनाएको स्मरण संगीतकार सापकोटाले गरे । अग्रजहरु नै चोरीमा संलग्न भएमा भविष्यमा त्यस्तो कामलाई प्रोत्साहन मिल्ने भएकाले आफूले आवाज उठाएको उनले बताए ।

‘यो कामलाई निरुत्साहित गर्न म आएको हुँ’ उनले भने । फेव्रुअरी ६ मा रिलिज भएको गीत नोगेन अहिले युटयुव ट्रेन्डिङको शीर्षस्थानमा छ ।