‘हनी बनी’मा अनमोल केसी अनुबन्धित, मार्चदेखि लन्डनमा छायांकन सुरु हुने

काठमाडौँ । फिल्म ‘एक्स नाइन’ छायांकन अनिश्चित बनेपछि अभिनेता अनमोल केसीले अर्को नयाँ फिल्म ‘हनी बनी’ साइन गरेका छन् । दीवाकर भट्टराईको निर्देशनमा निर्माण हुन लागेको फिल्मको छायांकन लन्डनमा हुने जनाइएको छ । निर्माता र अनमोलबीच तीन दिनअघि सम्झौतापत्रमा हस्ताक्षर हुने जनाइएको छ ।

स्टार-कास्टले चर्चा पाएको फिल्म ‘एक्स नाइन’को निर्माण नै अनिश्चित भएपछि अनमोलले नयाँ प्रोजेक्टलाई अघि बढाएका हुन् । ‘एक्स नाइन’लाई अनमोलले जनवरी र फेव्रुअरी महिनाको समय दिएका थिए । साथै, अनमोलले होम प्रोजेक्ट कै फिल्म गर्ने कि बहिरको गर्ने भन्नेबारे अन्यौल थियो । तर, ‘हनी बनी’सँगै अनमोलले घरबाहिरको फिल्ममा काम गर्ने विकल्प छानेका छन् ।

तर, निर्माण पक्षले चाहिँ अनमोलले फिल्म साइन गरेको खुलाएको छैन । भ्यालेन्टाइन डेको दिनमा निर्माताले अनमोलले फिल्म साइन गरेको जानकारीसहित टीजर पोस्टर लन्च गर्ने तयारी गरेका छन् । तर, फिल्ममा अनमोलको अनस्क्रिन जोडी को हुने भन्ने टुंगो छैन । मार्चदेखि फिल्म छायांकन हुने जनाइएको छ ।