चम्सुरीको मिर्गौला प्रत्यारोपण रोकियो : टिचिङले सेवा सुचारु नगर्दा ढिलाइ

काठमाडौं । अभिनेत्री पल्पसा डंगोल ‘चम्सुरी’को मिर्गौला प्रत्यारोपण तत्काल नहुने भएको छ ।

कोभिड-१९ संक्रमणको कारण देखाउँदै शिक्षण अस्पतालले मिर्गौला प्रत्यारोपण सेवा तत्काल सुरु नगरेपछि चम्सुरीसहितका बिरामीको प्रत्यारोपण रोकिएको हो । मंगलबारको लागि प्रत्यारोपण हुने भनिएको थियो । 

यसबारे चम्सुरीले भनिन्, ‘कोरोनाको कारण सबै तयारी रोकियो । अबको तीन सातापछि मिर्गौला पाउँछु होला ।’ आठ महिनाअघि उनका दुबै मिर्गौला फेल भएका थिए ।

उनकै भाइ पर्ने नाताका व्यक्तिले मिर्गाैला दिने निश्चित भएपछि पल्पसाको खुशि फर्किएको थियो भने उनी मेरी बास्सैको केही एपिसोडमा देखिएकी थिइन् ।

उनी सातामा तीनपटक मिर्गौला डायलासिसको लागि कीर्तिपुरस्थित माइती र बालाजुस्थित घरमा आउजाउ गरिरहेकी छिन् । ‘मेरी बास्सै’ सिरिजबाट चम्सुरी दर्शकमाझ चर्चित छिन् ।