‘चिसो मान्छे’ असार ३ गते प्रदर्शन हुने : यस्तो छ पोस्टरमा स्वस्तिमाको ‘बझाङी’ लुक्स

काठमाडौं । मान्छे रुवाउन खप्पीस निर्देशक दीपेन्द्र के खनालको आगामी फिल्म ‘चिसो मान्छे’ आगामी असार ३ गते प्रदर्शन हुने भएको छ । फस्टलुक पोस्टर लन्च गर्दै फिल्मले नयाँ प्रदर्शन मिति घोषणा गरेको छ ।

बैशाख ३० गतेको पूर्वनिर्धारित मितिमा सरकारले स्थानिय निकायको चुनाव घोषणा गरेपछि प्रदर्शन पोस्टपोन्ड भएको हो ।

वितरकसँग सल्लाहपछि निर्देशक खनाल र निर्मात्री शर्मिला पाण्डेले प्रदर्शनलाई आगामी वर्षायाममा रिलिज गर्ने निधो गरेका हुन् ।

पशुपतिप्रसाद र आमा फेम्ड निर्देशकको यो फिल्मलाई पनि फिल्म वृत्तमा चासोको साथ लिइएको छ । श्रम बेच्न मलेसिया पुगेका नेपाली कामदारको मृत्यु भएपछि उनको शव नेपाल ल्याउन गरिएको संघर्ष फिल्मको कथावस्तु हो ।

फिल्मले उक्त शवलाई काठमाडौंदेखि बझाङसम्म लैजान गरिएको मर्मस्पर्शी दुःखान्तलाई फिल्मले चित्रण गर्छ । ‘मेरो फिल्मले लकडाउनपछिको नेपाली समाजको अँध्यारो पाटोलाई चित्रण गर्छ’ निर्देशक खनालले नेपाल प्रेसलाई भने ।

२०७७ माघ १२ गते मलेसियामा मृत्यु भएकाहरुको १७ शव काठमाडौं ल्याउँदाको तस्बिर फेसबुकमा सेयर गर्दै दीपेन्द्रले लेखेका थिए : ”उही गाडी, त्यही बाकस, त्यस्तै कविता…चिसो मान्छेको एउटा दृश्य हुबहु । हार्दिक श्रद्धाञ्जली ।”

सार्वजनिक रिलिज डेटसहितको पोस्टरमा लिड एक्ट्रेस स्वस्तिमा खड्कालाई सुदुरपश्चिमको बझाङी आञ्चलिकताको गेटअपमा देख्न सकिन्छ । यो पोस्टरलार्ई राम्रो प्रतिक्रिया मिलेको छ । दीपेन्द्रका अघिल्ला दुई फिल्महरु आमा र पशुपति प्रसाद ब्लकबस्टर भैसकेका छन् । उनी पशुपति प्रसादको सिक्वेल बनाउने तयारीमा समेत छन् ।