फिल्म प्रदर्शन कार्यदलको निर्णय : ‘म यस्तो गीत गाउँछु २’ लाई फागुन १३ गते रिलिज अनुमति

काठमाडौं । चलचित्र प्रदर्शन कार्यदलको अनुमतिपछि फिल्म ‘म यस्तो गीत गाउँछु २’ फागुन १३ गते रिलिज हुने भएको छ ।

मंगलबार बसेको कार्यदलको बैठकले पल शाह र पूजा शर्मा स्टारर फिल्मलाई शिवरात्री छेकोमा प्रदर्शन अनुमति दिएको हो ।

यसअघि माघ १९ गते रिलिज मिति घोषणा गरेको सुदर्शन थापा निर्देशित उक्त फिल्म कोरोनाभाइरस संक्रमण रोकथामको लागि लागू गरिएको स्मार्ट लकडाउनले रोकिएको थियो ।

तर, फागुन १३ गते रिलिज मिति घोषणा गरिसकेको अर्को फिल्म ‘लप्पन छप्पन २’को प्रदर्शन चाहिँ स्थगित भएको छ । कार्यदल संयोजक अशोक शर्माले लकडाउनले रोकिएको ‘म यस्तो गीत गाउँछु २’ फिल्मलाई प्रदर्शन अनुमति दिइएको बताए ।

तर, लप्पन छप्पन २ लाई पछि रिलिज गर्न मिल्ने गरि अनुमति नदिइएको शर्माको भनाई छ । चैत मसान्तसम्म फिल्म रिलिजको निर्णय गर्ने अधिकार उक्त कार्यदलमा निहित छ । कार्यदलकै सिफारिसमा रिलिज हुने फिल्मले हलबाट प्राप्त हुने सेयरमा लाभ लिन सक्नेछन् ।

कार्यदलले अनुमति दिएपछि फिल्म निर्मात्री ‘म यस्तो गीत गाउँछु २’का निर्माता, निर्देशक र कलाकारले नयाँ प्रदर्शन मितिसहितको पोस्टर समेत लन्च गरेका छन् ।