चुनाव घोषणाको साइड-इफेक्ट : ‘चिसो मान्छे’ पोस्टपोन्ड, ‘कबड्डी ४’ अन्यौलमा

काठमाडौं । सरकारले आगामी बैशाख ३० गते स्थानीय निकायको चुनाव मिति घोषणा गरेपछि यसको असर फिल्म क्षेत्रमा देखिएको छ ।

पूर्वनिर्धारित रिलिज मितिमै चुनाब हुने भएपछि दीपेन्द्र के खनाल निर्देशित फिल्म ‘चिसो मान्छे’को प्रदर्शन स्थगित भएको छ ।

‘चुनावकै कारण प्रदर्शन मिति रोकिएको छ । वितरकसँग सल्लाहपछि अब नयाँ प्रदर्शन मिति घोषणा गर्नेछौं’ नेपाल प्रेससँग निर्देशक खनालले भने । उनका अनुसार सम्भवतः ‘चिसो मान्छे’ दशैं छेकोमा प्रदर्शन हुनसक्छ ।

चुनावको एकसाताअघि बैशाख २३ गते ‘लप्पन छप्पन’ र ‘कबड्डी ४’ पनि प्रदर्शन मिति घोषणा गरेका छन् । कबड्डी निर्माता मणिराम पोखरेलले आफूहरु पूर्वनिर्धारित मितिमै अडिग भएकाले नसर्ने बताए ।

‘चुनाबको एकसाताअघि नै फिल्म रिलिज भएकाले भोट हाल्न गाउँ जाने दर्शकले उतै फिल्म हेर्नसक्छन्’ फिल्म रिलिज नसर्ने तर्क पेश गर्दै निर्माता पोखरेलले भने ।