महाभारतमा ‘भीम’ बनेका अभिनेता प्रवीणको निधन

मुम्बई । हिन्दू धर्मग्रन्थ ‘महाभारत’मा आधारित सिरिजमा भीमको चरित्र निर्वाह गरेका अभिनेता प्रवीणकुमार सोब्तीको ७५ वर्षको उमेरमा निधन भएको छ ।

इन्डियन एक्सप्रेसका अनुसार सोमबार बेलुका ९ः३० बजे हृदयघातले उनको निधन भएको छोरी निकुनिकाले जनाएकी छिन् । भीमबाहेक अभिनेता सोब्तीले महाभारतबाहेक अमिताभ बच्चन स्टारर ‘सेहनसाह’ र धर्मेन्द्रको लोहामा समेत अभिनय गरेका छन् ।

अभिनेता बन्नुअघि थ्रो खेलाडी थिए । उनले एसियाली खेलकुदमा चारवटा पदक जितेका छन् । सन् १९६८ मा मेक्सिको र १९७२ मा म्युनिखमा भएको ओलम्पिकमा उनले भाग लिएका थिए ।

साथै उनी भारतीय सुरक्षा बलका अफिसर समेत थिए । सन् १९८१ मा रिलिज भएको फिल्म रक्षाबाट उनले अभिनयमा डेब्यु गरेका थिए । सन् १९९८ मा रिलिज भएको ‘ट्रेन टु पाकिस्तान’ उनको अन्तिम फिल्म बन्यो ।