आलिया स्टारर ‘गंगुबाई कठियावाडी’ ट्रेलर लन्च : नामुद यौनकर्मीदेखि राजनीतिक नेतृसम्मको कथा चित्रण

काठमाडौं । आलिया भाट र अजय देवगण स्टारर बहुप्रतीक्षित बलिउड फिल्म ‘गंगुबाइ कठियावाडी’को अफिसियल ट्रेलर लन्च भएको छ ।

३ मिनेट लामो ट्रेलरमा आलियाले मुम्बईकी माफिया क्वीनको नामले चिनिने गंगुबाइको चरित्र निर्वाह गरेकी छिन् । एक नामुद यौनकर्मीले राजनीतिक नेतृ बन्न तय गरेको यात्रा यसको कथावस्तु हो ।

पछिल्लो छिमलमा बलिउडमा रुचाइएकी आलियाको अभिनयको प्रशंसा मिल्ने अपेक्षा गरिएको छ । अजय देवगण समेत ट्रेलरमा फिचर्ड छन् । संजयलीला भन्सालीको निर्माण र निर्देशन रहेको फिल्म फेब्रुअरी २५ मा रिलिज हुने तयारीमा छ ।

कोभिड-१९ महामारीले पटक-पटक रिलिज स्थगन गरेको फिल्म अन्ततः रिलिज हुन लागेको हो । ट्रेलर रिलिजको एकदिन अघि सार्वजनिक गरिएको पोस्टरबाटै फिल्मले राम्रो प्रतिक्रिया प्राप्त गरेको थियो ।

निर्देशक भन्सालीका फिल्ममा संवाद पक्ष निकै बलशाली लाग्छन् । ट्रेलरमा पनि आकर्षक पञ्चलाइन समावेश गरिएको छ । बृहत क्यानभास समावेश हुने सिनेम्याटोग्राफी पनि ट्रेलरको आकर्षक पक्ष हो ।

भारतीय संचारमाध्यमले कोरोना महामारीको तेस्रो लहरले पुनः थला परेको फिल्म उद्योगलाई गंगुबाईले राहत प्रदान गर्ने अपेक्षा गरेका छन् ।