स्कारलेट जोहान्सन संसारकै धेरै कमाउने अभिनेत्री : यी हुन् यसवर्षका महंगा १० नायिका

काठमाडौं । कोरोना महामारीले पछिल्लो दुईवर्ष हलिउड पनि पूर्णरुपमा प्रभावित बन्यो । तर, यसको बाबजुद पनि हलिउडका केही अभिनेत्रीले कोरोना कालमा राम्रो कमाउन सफल भए ।

हलिउड एक्ट्रेसहरु अन्य मुलुकका फिल्म उद्योगका नायिकाभन्दा कमाउने मामिलामा पनि अघि छन् । सन् २०२१ देखि सन् २०२२ सम्म एभेन्जर्स अभिनेत्री स्कारलेट जोहान्सन, एन्जेलिना जोली, गल ग्याडेट सर्वाधिक कमाउने नायिका बनेका छन् ।

३६ वर्षिया हलिउड अभिनेत्री जोहान्सन सन् २०१८ यता सर्वाधिक कमाउने अभिनेत्री बनेकी छिन् । यस पछाडि अभिनयप्रति उनको लगाव र एकपछि अर्को गरि रिलिज हुने उनका हिट फिल्महरु हुन् ।

स्कारलेटले गतवर्ष ४१८ करोड भारु कमाएकी छिन् । ब्ल्याक विडो, द एभेन्जर्स, अन्डर द स्किनजस्ता हिट फिल्ममा समेत काम गरेकी छिन् । उनले केही सामाजिक संस्थालाई उनले दान पनि गरेकी छिन् । उनी एचआइभी एड्सविरुद्धको अभियान पनि सक्रिय छिन् ।

अभिनेत्री, टिभी प्रस्तोता र निर्मात्री सोफिया वेरगारा सर्वाधिक कमाउने सूचीको दोस्रो स्थानमा छिन् । सन् २०२१ मा उनले ३२१ करोड भारु कमाएकी छिन् ।

गोल्डेन ग्लोब अवार्ड विजेता नायिका रिज विदरस्पुनले २६९ करोड भारु कमाएकी छिन् । एन्जेलिना जोली २६५ करोड भारु आम्दानीसहित चौंथो स्थानमा छिन् । १८ वर्षको उमेरमा मिस इजरायलको उपाधि जितेकी नायिका गल ग्याडटले २३५ करोड भारु कमाएकी छिन् ।

तीनवटा गोल्डेन ग्लोब्स अवार्ड जितेकी नायिका जुलिया रोबर्ट्स २२४ करोड भारु कमाएकी छिन् । ‘हंगर गेम्स’ फेम्ड अभिनेत्री जेनिफर लरेन्स २०९ करोडसहित सूचीमा छिन् । जेनिफर एनिस्टले पनि सोही बराबरको कमाइ गरेको जनाइएको छ ।

कमेडियन तथा निर्मात्री मेलिना म्याककार्थीले सन् २०२१ मा १८७ करोड भारु कमाएकी छिन् । केली कुआको १८७ करोड भारु, मेरिल स्ट्रिप १७९ करोड भारु, मार्गोट रोबी १७५ करोड भारु, शार्लिन सेरोन १७१ करोड भारु, एमिली ब्लन्ट १६८ करोड भारु र निकोल किडम्यान १६५ करोड भारुसहित सर्वाधिक कमाउने अभिनेत्रीको सूचीमा छन् ।