‘आरआरआर’ चैत ११ गते आउने : पोस्टपोन्ड होला ‘हेलो जिन्दगी’ ?

काठमाडौं । ‘बाहुबली’ फेम्ड एसएस राजामौली निर्देशित बहुप्रतीक्षित दक्षिण भारतीय फिल्म ‘आरआरआर’ आगामी चैत ११ गते रिलिज हुने भएको छ ।

बलिउड हंगामा पोर्टलका अनुसार रामचरण, एनटीआर जुनिअर, आलिया भाट र अजय देवगण स्टारर फिल्म मार्च २५ मा आउने निश्चित भएको हो । निर्माताले ट्वीटरमार्फत फिल्म प्रदर्शन तय भएको जनाएका छन् ।

घर छाडेर टाढा यात्रामा निस्किएका दुई योद्धाहरुको कथा भन्ने फिल्मलाई लिएर नेपालमा पनि निकै चासो छ । सन् १९२० मा भारतमा बेलायती उपनिवेश रहँदा यी योद्धाहरुले गरेको संघर्षलाई फिल्मले चित्रण गर्छ ।

आरआरआरले तय गरेकै प्रदर्शन मितिमा नेपाली फिल्म ‘हेलो जिन्दगी’ पनि आउने तयारी छ । कोरोनाभाइरस महामारीको तेस्रो लहरले अहिले नेपाली फिल्म हलहरु बन्द रहेपनि संक्रमण घट्नेतर्फ उन्मुख भएकाले फागुनदेखि फिल्म हलहरु खुल्ने अपेक्षा गरिएको छ ।

दक्षिण भारतीय फिल्म ‘पुष्पा’ले नेपाली बक्सअफिसमा १० करोड ग्रसभन्दा बढी कमाइ गरेको पृष्ठभूमिमा रिलिज हुन लागेको ‘आरआरआर’ले राम्रै कमाइ गर्नसक्ने आशा नेपाली वितरक र हल संचालकले लिएका छन् ।