मछिन्द्रलाई हराउँदै एपीएफ आहारारा गोल्डकपको फाइनलमा (भिडिओ)

काठमाडौं । सहिद स्मारक ‘ए’ डिभिजन लिग लिडर मछिन्द्र फुटबल क्लबलाई ३–१ गोलको नतिजामा हराउँदै एपीएफ क्लब २०औं संस्करणको आहारारा गोल्डकपको फाइनल प्रवेश गरेको छ ।

बुधबार पोखरा रंगाशालामा भएको पहिलो सेमिफाइनल खेलमा मछिन्द्रमाथि सानदार जित निकालेको एपीएफका लागि सनिस श्रेष्ठ, नविन लामा र प्रदिप लामाले गोल गरेका थिए । ओमोलाजा करिमले मछिन्द्रका लागि सान्त्वना गोल गरे ।

एपीएफलाई अग्रता दिलाउन सनिस श्रेष्ठले २५औं मिनेटमा पहिलो गोल गरेका थिए । मछिन्द्रका ओमोलाजा करिमले ४०औं मिनेटमा बराबरी गोल फर्काएका थिए ।

पहिलो हाफ बराबरीमा सकिएको खेलको ६९औं मिनेटमा एपीएफका लागि प्रदिप लामाले दोस्रो गोल गर्दै पुनः टोलीलाई अग्रता दिलाएका थिए ।
मछिन्द्रका करिमले ७२औं मिनेटमा दोहोरो पहेँलो कार्ड पाएपछि मछिन्द्र १० खेलाडीमा सिमित भएको थियो ।

एक गोलको अग्रता बनाएको एपीएफलाई जित दिलाउन कप्तान नवीन लामाले खेलको इन्जुरी समयमा गोल गरेका थिए । नवीनको गोलसँगै एपीएफले फाइनलमा स्थान पक्का गरेको हो ।

एपीएफले फाइनलमा मनाङ् मर्स्याङदी क्लब र त्रिभुवन आर्मी क्लबको विजेतासँग प्रतिस्पर्धा गर्नेछ । प्रतियोगिताको दोस्रो सेमिफाइनल भोली हुनेछ ।