‘कठ्पुतलीलाई पहिलो साता १.६३ करोड ग्रस, शनिबार अकुपेन्सीमा देखियो ‘ओमिक्रोन असर’

काठमाडौं । फिल्म ‘कठ्पुतली’ले मिश्रित समीक्षाको बाबजुद पहिलो साता घरेलु बक्सअफिसमा उत्साहजनक कमाइ गरेको छ । बिहीबार अबेरसम्मको प्राप्त विवरणअनुसार फिल्मको कूल कमाइ १ करोड ६३ लाख ग्रस छ ।

तर, ओमिक्रोन भेरिएन्ट फैलिएसँगैको त्रासको कारण दोस्रो साता फिल्मको कमाइ चुनौतिपूर्ण हुने अपेक्षा गरिएको छ । यो त्रासको असर शनिबार नेपाली बक्सअफिसमा स्पष्ट देखिएको छ ।

प्रदर्शनरत कठ्पुतली, स्पाइडरम्यान र पुष्पाले राम्रो सोज प्राप्त गरेपनि कुनैपनि फिल्मको अकुपेन्सी सन्तोषजनक छैन । अकुपेन्सीमा भारी गिरावट देखिएको छ । स्पाइडरम्यान र पुष्पा पनि २० देखि ३० प्रतिशत अकुपेन्सीमा प्रदर्शनरत छन् ।

कार्म, उषा रजक र मिथिला शर्मा स्टारर कठ्पुतलीको पहिलो साता सुखद रह्यो । यो फिल्म कोरोनाभाइरस महामारीयता सर्वाधिक कमाउने नेपाली फिल्म समेत बन्यो ।

पछिल्लो सप्ताहन्त ओमिक्रोन भेरिएन्टको दबाब सुरु भएपछि नेपाली बक्सअफिसको आगामी समय कस्तो हुनेछ भन्ने कुरा कोरोनाको स्थितीमा निर्भर हुनेछ । सोमबारभित्र बस्ने काठमाडौं उपत्यकाका तीन सीडीओको बैठकले भीडभाड हुने क्षेत्र बन्द गर्ने निर्णय गर्ने अपेक्षा गरिएको छ ।

यो निर्णयको पहिलो असर फिल्म क्षेत्रमै पर्ने भएकाले पक्कै पनि नेपाली फिल्मको लागि चुनौति थपिनेछ ।