सत्तारुढ गठबन्धनका शीर्ष नेताहरु कोरोनाको कन्ट्याक्ट ट्रेसिङमा

काठमाडौं । माओवादी अध्यक्ष पुष्पकमल दाहाल प्रचण्डलाई कोभिड-१९ संक्रमण पुष्टि भएपछि प्रधानमन्त्रीसहित सत्तारुढ गठबन्धनका शीर्ष नेताहरु कन्ट्याक्ट ट्रेसिङमा परेका छन् ।

स्वास्थ्य मन्त्रालय स्रोतले शीर्ष नेताहरुलाई कन्ट्याक्ट ट्रेसिङमा राखिएको जनाएको छ । शुक्रबार प्रधानमन्त्री निवास बालुवाटारमा बसेको सत्तारुढ पाँच दलीय गठबन्धनका नेताहरु कोरोनाको ट्रेसिङमा परेका हुन् ।

उक्त बैठकमा प्रचण्डसहित प्रधानमन्त्री शेरबहादुर देउवा, नेकपा एसका अध्यक्ष माधव नेपाल, जनमोर्चाकी दुर्गा पौडेल, जसपा नेताहरु उपेन्द्र यादव र बाबुराम भट्टराई, संचारमन्त्री ज्ञानेन्द्र कार्की, कांग्रेस नेता रामचन्द्र पौडेल, नेकपा एसका नेता वेदुराम भुषाल सहभागी थिए ।

प्रचण्डलाई कोरोना पुष्टि भएपछि बैठकमा सहभागी सबै नेताहरुको सम्पर्क पहिचान गरिएको हो ।

शुक्रबार नेपालमा २४ जनामा कोरोनाभाइरसको नयाँ भेरिएन्ट ओमिक्रोन संक्रमण पुष्टि भएको थियो । हिजोमात्रै झन्डै हजार कोरोना संक्रमित थपिएका छन् ।