दीपेन्द्रको लेखन र सुरजको डेब्यु निर्देशनमा फिल्म ‘परस्त्री’ बन्ने

काठमाडौं । अभिनेता तथा निर्माता सुरज पाण्डेको निर्देशनमा फिल्म ‘परस्त्री’ निर्माण हुने भएको छ । ‘लभ लभ लभ’ फेम्ड अभिनेताले निर्देशनमा डेब्यु गर्न लागेका हुन् ।

शुक्रबार राजधानीमा आयोजित पत्रकार सम्मेलनमा फिल्म निर्माणको घोषणा भयो । दीपेन्द्र के खनालको पटकथा रहने फिल्मलाई डीएस डिजिटल कम्पनीले निर्माण गर्न लागेको हो ।

फिल्मलाई नेपालीसँगै हिन्दी भाषामा समेत निर्माण गरिने भएको छ । ‘मोक्ष’ फेम्ड अभिनेता तथा गायक कोसिस क्षेत्रीको मुख्य भूमिका हुने फिल्मका अन्य कलाकार तय हुने क्रममा छन् ।

फिल्मका अन्य कलाकारको लागि २२ देखि २७ वर्षभित्रका अभिनेता, २२ देखि ३० वर्षभित्रकी अभिनेत्री र २० देखि २५ वर्षभित्रकी सहायक अभिनेत्री अडिसनमार्फत छानिने छन् ।

सामाजिक कथावस्तुमा निर्माण हुन लागेको फिल्म कोरोनाभाइरस महामारीको परिस्थितीमा सुधार भए फागुन तेस्रो सातादेखि छायांकनमा जाने भएको छ ।

सबै छायांकन राजधानी काठमाडौंमा हुनेछ । निर्देशनमा डेव्यु गर्न लागेका पाण्डेले आफ्नो पहिलो प्राथमिकता अभिनय भन्दापनि निर्देशन रहेको बताए । फिल्म क्षेत्रमा प्रवेश गरेदेखि नै आफू निर्देशकको रुपमा आउने चाहाना भएकाले पनि लामो समय निर्देशनमा अध्ययन र अनुसन्धान गरेर ‘परस्त्री’ निर्देशन गर्ने हिम्मत जुटाएको बताए ।

लेखक तथा निर्माता खनालले यो फिल्मको कथा पूर्णरुपमा नेपाली परिवेशमा तयार पारिएको र विश्वका अन्य कुनै पनि फिल्मबाट प्रभावित नभएको बताए । ‘आजसम्म मैले निर्देशन गरेका कुनैपनि फिल्म विदेशीबाट प्रभावित छैनन् र यो पनि विल्कुलै नयाँ र दर्शकको अपेक्षमा खरो उत्रनेछ’ उनले भने ।

आफ्नो कथालाई डेव्यु निर्देशक पाण्डेले न्याय गर्न सक्ने भएका नै उनलाई निर्देशनको जिम्मेवारी सुम्पेको उनको भनाई छ । साथै सुरजलाई निर्देशनमा आफूले कुनैपनि हस्तक्षेप नगर्ने दावी निर्देशक तथा खनालको छ ।

निर्देशक खनालले निर्माता पाण्डेसँग मिलेर निर्माण गरेको फिल्म ‘चिसो मान्छे’ प्रदर्शन तयारीमा छ । यो फिल्म कोरोना महामारीको तेस्रो लहरले असर नगरेको खण्डमा आगामी वर्षको बैशाख ३० गतेबाट प्रदर्शनमा आउनेछ ।