ऋचा शर्माको निर्माणमा बनेको फिल्म ‘कौसिद’ टीजर ट्रेलर लन्च : यस्तो छ भोलाराजको फस्टलुक

काठमाडौं । अभिनेत्री ऋचा शर्माको प्रस्तुतिमा तयार भएको फिल्म ‘कौसिद’ टीजर ट्रेलर सार्वजनिक भएको छ । कोभिड महामारीबीच फिल्मको छायांकनसँगै पोस्ट-प्रोडक्सनको काम सकाउँदै फस्टलुक सार्वजनिक गरिएको निर्देशक कुमार भाष्करले बताए । उनका अनुसार फिल्म प्रदर्शनको लागि तयार भैसकेको छ ।

टीजरमा पिँजडामा खरायो बोकेको लुक्समा अभिनेता भोलाराज सापकोटा फिचर्ड छन् । ऋणको चपेटामा परेको पात्रको जीवन भोगाइ आधारित कथामा बनेको फिल्मको टीजरले पिँजडामा परेको जीवनको उन्मुक्तिको संघर्ष भाव चित्रण गर्छ ।

फिल्ममा सापकोटा र ऋचासँगै रुपेश दाहाल, परिक्षित विक्रम राणा, सदिक्षा गौतम, निर्भिक भट्टराई र सागर भट्टराई मुख्य भूमिकामा छन् । निर्माता केदार भुसाल हुन् भने कार्यकारी निर्मातामा दिमेश श्रेष्ठ तथा सह-निर्मातामा लक्ष्मण बानियाँ छन् ।

निर्देशक भाष्करकै पटकथामा बनेको फिल्मको कथा लेखन नवविजय प्रकाश श्रेष्ठ र धिर्जन थपलियाले गरेका छन् । निसाल पौडेलले छायाँकन गरेको फिल्ममा मित्र गुरुङ र भीम विश्वकर्माको सम्पादन छ । बड पिक्चर्सको ब्यानरमा यो फिल्म निर्माण भएको हो । फिल्म क्षेत्रमा परिरहेको र पर्नसक्ने कोरोना महामारीको सम्भावित असरलाई मध्यनजर गरेर छिट्टै नै फिल्मको प्रदर्शन मिति सार्वजनिक गरिने जनाइएको छ ।