ओमिक्रोन त्रासले ग्रामी अवार्ड स्थगित

लस-एन्जल्स । कोरोनाभाइरसको नयाँ भेरिएन्ट ओमिक्रोनसहितको नयाँ लहरले विश्व संगीतको सर्वोच्च अवार्ड ग्रामी पोस्टपोन्ड भएको छ । पिपुल म्यागजिनका अनुसार अर्को सूचना नआएसम्म अवार्ड कार्यक्रम स्थगित हुने भएको छ ।

रेकर्डिङ एकाडेमी र सीबीएसले संयुक्त विज्ञप्ति प्रकाशित गर्दै अवार्ड स्थगन भएको जनाएका छन् । ‘संगीत समुदाय, दर्शक र कार्यक्रम निर्माण गर्न अथकरुपमा खट्ने कर्मचारीको स्वास्थ्य र सुरक्षा हाम्रो उच्च प्राथमिकतामा छ’ विज्ञप्तिमा उल्लेख छ ।

जनवरी ३१ मा अवार्ड समारोह आयोजना गर्ने तयारी थियो । ‘ओमिक्रोन भेरिएन्टको लहरले अन्यौलता सिर्जना गरेको छ । निकट भविष्यमै हामी ग्रामीको उत्सव मनाउन जुट्नेछौं । नयाँ मिति चाँडै सार्वजनिक गर्नेछौं’ विज्ञप्तिमा उल्लेख छ ।

लगातार दुईवर्षदेखि ग्रामी अवार्ड महामारीले स्थगित भएको छ । अहिले अमेरिकामा दैनिक १० लाख कोरोना संक्रमित थपिने गरेका छन् ।