चोरीको आरोप लागेपछि मेलिना राई र किरण गजमेरको गीत ‘हे दैव’ युट्युवबाट हटाइयो

काठमाडौं । गीत चोरीको आरोप लागेपछि मेलिना राई र किरण गजमेरको स्वरमा रहेको ‘हे दैव’ गीतलाई बुधबार युट्युवबाट हटाइएको छ ।

सो गीतको सुरुआती हरफ नै आफ्ना रचनाबाट चोरी गरेको दावी गीतकार भूपेन्द्र खड्काले गरेपछि गीतलाई हटाइएको हो । अहिले उक्त गीत युट्युवमा उपलब्ध छैन ।

कर्णदासको स्वर र खड्काको रचनामा रहेको गीत ‘भेटिएर छुट्नुभन्दा नभेटिएकै जाती हुन्थ्यो, हामीबीचको सम्बन्ध यो अझै कति माथि हुन्थ्यो’ गीत अनुमतिबिना चोरी गरिएको आरोप खड्काको छ ।

उक्त गीत २०६१ सालमा रेकर्ड भएर २०६२ मा एल्बम ‘आधा सपना’मार्फत रिलिज गरिएको थियो । नेपाल प्रेससँग कुरा गर्दै रचनाकार खड्काले आफूले क्षतिपूर्ति दावी गर्ने तयारी गर्नुअघि नै उक्त गीतलाई युट्युवबाट हटाइएको बताए ।

‘मैले डाउनलोड पनि गरेको थिएँ । युट्युवबाटै हटाइएपनि डाउनलोड भर्सन पनि अहिले खुलेको छैन’ उनले भने । सम्बन्धित पक्षले गल्ती स्वीकार्दै आगामी दिनमा गल्ती नदोहोर्‍याउने वाचा गरेकाले अहिले गीतमात्र हटाइएको उनले बताए ।

फिल्म निर्माता समेत रहेका रमेश एमके पौडेलको निर्माण र रामजी लामिछानेको निर्देशनमा उक्त भिडिओ निर्माण भएको थियो । सलोन बस्नेत र रुबिना थापाले उक्त गीतमा अभिनय गरेका थिए ।