अनमोल र स्वतन्त्रले आगामी प्रोजेक्टमा सहकार्य गर्ने

काठमाडौं । अभिनेता अनमोल केसी र कलाकार एवं उद्यमी स्वतन्त्रप्रताप शाहले नयाँ प्रोजेक्टमा सहकार्य गर्ने भएका छन् । यसैसाता भएको मिटिङमा स्वतन्त्रले अनमोललाई लिएर प्रोजेक्ट अघि बढाउन चाहेका हुन् ।

यसैमहिना अन्तर्राष्ट्रिय युवा उद्यमी संघको अध्यक्षमा चुनिएका स्वतन्त्रले नेपालमा फिल्म र शैक्षिक परामर्श कम्पनीहरुमा लगानी गरिरहेका छन् । मेरो भ्यालेन्टाइन, फेसबुकजस्ता फिल्ममा अभिनय गरेका स्वतन्त्रले नयाँ फिल्म निर्माणको तयारी पनि गरिरहेका छन् ।

स्वतन्त्र र अनमोलले फिल्म वा अन्य व्यवसायिक क्षेत्रमध्ये कुनमा सहकार्य गर्न लागेका हुन् भन्नेबारे खुलाइएको छैन । तर, पनि चाँडै उनीहरुले भविष्यको प्रोजेक्टबारे सार्वजनिक गर्ने तयारी गरिरहेका छन् । ‘उनीहरुले प्रोजेक्टमा काम गर्ने तयारी गरिरहेका छन् र यसबारे विस्तृत जानकारी आउनेछ’ स्रोतले नेपाल प्रेसलाई भन्यो ।