ओशो सन्यासी बनेपछि नम्रताले लेखिन् : प्रेम लक्ष्य हो, जीवन यात्रा हो !

काठमाडौं । मोडल तथा अभिनेत्री नम्रता सापकोटा प्रायः आफ्ना गतिविधिले चर्चामा आउँछिन् । लकडाउन अवधिभर उनी नेपोटिज्मको बहस तानिइन् । केही महिना पहिले बिहे नगरी बच्चा जन्माउने अभिव्यक्तिले चर्चामा आइन् । अहिले भने उनी ओशो सन्यासी बनेर चर्चामा छिन् ।

काठमाडौंको नागार्जुनस्थित ओशो तपोवन पुगेर नम्रता ओशामार्गी बनेकी हुन् । ओशोको गेरुवस्त्र पहिरिएर उनले सामाजिक संजालमा एउटा तस्बिर सेयर गरेकी छिन् । जुन पोस्टको क्याप्सन छ : प्रेम लक्ष्य हो । जीवन यात्रा हो । ओशो ।’ ओशो सन्यासी बनेसँगै उनले घाँटीमा ओशो अंकित माला पनि लगाएकी छिन् ।

उनी प्रत्येक महिना आयोजना हुने ओशो ध्यान शिविरमा भाग लिन तपोवन पुगेकी हुन् । एक साताको शिविर सकेर उनी मंगलबार घर फर्किएकी छिन् । हरेक महिनाको ७ देखि १४ तारिखसम्म चल्ने ओशो ध्यान शिविरमा सहभागी हुन नम्रता ओशो तपोवन पुगेकी हुन् । एक हप्ताको शिविर सकेर उनी मंगलवार घर फर्किँदैछिन् । अर्की अभिनेत्री तथा ओशो सन्यासी शोभिता सिम्खडाले नम्रतालाई ओशो परिवारमा स्वागत छ भन्दै फोटो पोस्ट गरेकी छिन् ।

नम्रता र शोभितमात्र ओशामार्गी बनेका पहिलो सेलेव्रिटी चाहिँ होइनन् । यसअघि तपोवनमा आयोजना हुने विपश्याना ध्यान शिविरमा मनिषा कोइराला, केकी अधिकारी, बेनिशा हमाल लगायतले ओशो तपोवनमा गएर ध्यान शिविरमा भाग लिइसकेका छन् ।