सन् २०२२ मा नेपाली कलाकारले वर्ल्ड टुर थाल्ने : मेलिना, तृष्णा, एड्रिनदेखि संजयसम्मले भाग लिँदै

काठमाडौं । सन् २०२२ देखि नेपाली संगीतकर्मीले वर्ल्ड टुर थाल्ने भएका छन् । कोरोनाभाइरस महामारीले दुईवर्षदेखि हुन नसकेको ‘पिस एन्ड युनिटी अ म्युजिकल टुर’ आउँदो वर्षदेखि सुरु हुने जानकारी बिहीबार राजधानीमा आयोजित पत्रकार सम्मेलनमा दिइयो ।

सन् २०१९ मा यो टुर एक पटक भएको थियो तर त्यसपछि महामारीको कारण विभिन्न मुलुकले प्रतिबन्ध लगाएपछि टुर रोकिएको थियो । सन् २०१९ मा सुगम पोखरेल, वर्षा राउत र तृष्णा गुरुङले युरोपका विभिन्न देशमा आफ्नो प्रस्तुति दिएका थिए । यो पटक भने गायकहरु संजय श्रेष्ठ, दीपक बज्राचार्य, एड्रीन प्रधानसंगै गायिकाद्वय मेलिना राई र तृष्णा गुरुङ पनि वल्र्ड टुरमा जाने भएका छन् ।

अप्रिलदेखि जुनसम्म हुने यो टुरको सुरुवात जापानबाट हुने पिस एण्ड युनिटिका अध्यक्ष मनिष श्रेष्ठले बताए । जुनमा युरोपका केही देश र जुलाइमा अमेरिकामा कार्यक्रम भएपछी यो टुरको सकिने जनाइएको छ । अध्यक्ष श्रेष्ठका अनुसार जापान, युरोप र अमेरिकाका विभिन्न ठाउँमा टुर संचालन हुनेछ । तर, ती मुलुकहरुमा पछिल्लो समय कोरोनाभाइरसको नयाँ भेरिएन्ट संक्रमण भेटिएकाले प्रतिबन्धहरु लगाइएको छ ।

आयोजकले सन् २०२२ को सुरुआतसँगै टूर सुरु हुने भनेपनि यो समय योजना कोरोनाको महामारीको संक्रमणदर र विभिन्न मुलुकले भाइरस रोकथामका लागि लगाएका प्रतिबन्धलाई निरन्तरता दिएका छन् । क्वारेन्टिन लगायतका नियम पनि छन् ।

टुरका लागि संजय श्रेष्ठ, दीपक बज्राचार्य, एड्रीन प्रधान, मेलिना राई र तृष्णा गुरुङ न्युनतम पारीश्रमिकमा सहमत भएको कार्यक्रमका आयोजक किरण श्रेष्ठले जानकारी गराए । कार्यक्रममा बोल्दै उनले भने –टुरबाट भएको नाफाको ८० प्रतिशत रकम पिस एण्ड ब्युटिफुल चिल्ड्रेन वेलफेयर नामक संस्थालाई च्यारिटी दिइने भएकाले कलाकारहरुले कम पारीश्रमिकमा आफ्नो प्रस्तुति दिन तयार भएका हुन् ।’