नेपाल बक्सअफिस : ‘सूर्यवंशी’लाई पहिलो साता ४ करोड ग्रस, ‘इटर्नल्स’ र ‘साङ्ची’ पनि पछ्याउँदै

काठमाडौं । रोहित सेठ्ठी निर्देशित बलिउड फिल्म ‘सूर्यवंशी’को गति रोकिने छाँटकाँट छैन । दोस्रो शनिबार पनि फिल्मको देशव्यापी अकुपेन्सी ८० देखि शतप्रतिशत छ ।

फिल्मको नेपाल वितरक कम्पनी व्यांकटेस इन्टरटेनमेन्टले फिल्मको पहिलो साताको औपचारिक कमाइ सार्वजनिक गरेको छ । फिल्मले पहिलो सात दिनमा ४ करोड रुपैयाँ ग्रसभन्दा बढी कमाइ गरेको कम्पनीले जनाएको छ ।

वितरकले खरिदभन्दा दोब्बर कमाइ गरेका छन् । वितरक मनोज राठीले नेपाल प्रेससँग भने, ‘हाम्रो उद्देश्य विशुद्ध फिल्मको कमाइभन्दा पनि उद्योगलाई चलायमान बनाउनु र दर्शकलाई हलसम्म फर्काउनु नै हो । हामी त्यो प्रयासमा सफल भएका छौं ।’

फिल्मको वर्ड अफ माउथ सुखद भएकाले दोस्रो साता पनि फिल्मको कमाइ स्थिर हुने अपेक्षा गरिएको राठीले बताए । कट्रिना क्याफ र अक्षय कुमारको स्टारडम र हलमा फर्कने दर्शकीय हुटहुटीले फिल्मको कमाइमा योगदान दिएको वितरकले बताए ।

‘सूर्यवंशी’ले भारतीय बक्सअफिसमा शुक्रबारसम्म १२० करोड कमाइसकेको छ ।

‘सूर्यवंशी’पछि हलिउड फिल्म इटर्नल्स र साङ्चीको कमाइ पनि उत्साहजनक रहेको मल्टिप्लेक्स संचालकले जनाएका छन् । केही समयदेखि नेपाली फिल्म रिलिज भएका छैनन् ।