विश्वभर कोरोना संक्रमित संख्या २५ करोड नाघ्यो, युरोप पुनः हटस्पट बन्दै

काठमाडौं । विश्वभर कोरोनाभाइरसबाट संक्रमित हुने कूल संख्या २५ करोड नाघेको छ । युरोपमा पछिल्लो साता डेल्टा प्रजातिको कोरोनाको संक्रमणमा व्यापक वृद्धि भएको छ ।

कतिपय मुलुकले संक्रमणमा कमी आएपछि पर्यटन र व्यापार खुला गरिरहेका छन् । पछिल्लो तीन महिनामा दैनिक संक्रमण दरमा ३६ प्रतिशतले कमी आएको छ ।

रोयटर्सका अनुसार प्रत्येक ९० दिनमा ५० मिलियन मानिसमा भाइरस संक्रमण भएको छ । संक्रमण बढ्नुमा डेल्टा भेरिएन्टलाई कारण मानिएको छ । २४० मुलुकमध्ये ५५ वटामा अहिले पनि संक्रमणदर उच्च छ ।

रुस, युक्रेन र ग्रीसमा दुईवर्षअघि भाइरस संक्रमण सुरु भएयताकै सबैभन्दा उच्च संक्रमण देखिएको छ । पूर्वी युरोप सबैभन्दा कम खोप लगाउने क्षेत्र अन्तर्गत पर्छ । नयाँ संक्रमितमध्ये आधाजसो युरोपमै पुष्टि भएका छन् ।

विश्व स्वास्थ्य संगठनकी संक्रामक रोग विशेषज्ञ मारिया भान केरखोबेले सन् २०२२ को अन्त्यसम्म कोरोना नियन्त्रण हुनसक्ने बताएकी छिन् । विश्वभर कोभिडबाट मृत्यु हुनेको संख्या ५० लाख ४९ हजार नाघेको छ ।