‘सूर्यवंशी’ले भारतमा तीन दिनमा कमायो ७७ करोड भारु

काठमाडौं । अक्षयकुमार-कट्रिना क्याफ स्टारर ‘सूर्यवंशी’ले पहिलो सप्ताहन्त भारतीय बक्सअफिसमा ७७.६४ करोड भारु नेट कमाइ गरेको छ ।

शुक्रबार २६.२९ करोड, शनिबार २३.८५ करोड र आइतबार २७.५० करोड नेट कलेक्सन भएको भारतीय संचारमाध्यमले जनाएका छन् । केही दिनमै फिल्म सय करोड क्लबमा प्रवेश गर्ने भनिएको छ ।

रोहित सेठ्ठी निर्देशित फिल्मले भारतीय बक्सअफिसजस्तै नेपाली बक्सअफिसमा समेत उछाल कमाइ गरेको छ । अक्षय, कट्रिना, जावेद जाफरी, ज्याकी श्रोफ, गुल्सन ग्रोवरको मुख्य भूमिका छ ।

कोरोना महामारीपछि हल खुलेलगत्तै रिलिज भएको सूर्यवंशी बलिउडको ठूलो फिल्म हो । भारतबाहेक ओभरसिजमा पनि यसले आक्रामक कमाइ गरेको जनाइएको छ ।

सोमबार फुटफलमा केही गिरावट देखिएपनि पहिलो सप्ताहन्तकै ट्रेन्डलाई बक्सअफिसले पछ्याइरहेको देखिएको छ । आज पनि क्यूएफएक्स, वान सिनेमाजसहितका मल्टिप्लेक्समा फिल्मको अकुपेन्सी ७० देखि ८० प्रतिशतसम्म छ ।