काठमाडौंमा पुनः डेंगु संक्रमण पुष्टि, सतर्कता अपनाउन विज्ञको सुझाव

काठमाडौं । काठमाडौंमा एक वर्षपछि डेंगुको संक्रमण पुनः देखा परेको छ । काठमाडौंमा डेंगु फैलाउने एडीस जातको लामखुट्टे र उच्च जनघनत्व भएकाले जोखिम बढेको हो । हाल घट्टेकुलो, मैतीदेबी, कोटेश्वर आदि क्षेत्रमा डेंगुका संक्रमितहरु बढेको दखिएको छ ।

सन् २०१९ मा डेंगुले महामारीको रूप लिंदा काठमाडौँ शहर प्रभावित भएको थियो । डेंगुको डेन–१, २, ३ र ४ गरी चार सेरोटाईपहरु हुन्छन् । नेपालमा डेंगुका चारै सेरोटाईपहरु देखिइसकेको छ ।

डेंगुको दोश्रो पटक संक्रमण भए त्यसलाई ‘सेकेण्डरी डेंगु इन्फेक्सन’ पनि भनिन्छ । पहिलो डेंगुको सेरोटाईपभन्दा फरक सेरोटाईपले पुनः संक्रमण गरेको भए संक्रमितमा डेंगु झन कडा हुने अनुसन्धानहरुबाट प्रमाणित भइसकेको छ ।

त्यसैले, काठमाडौंमा सन् २०१९ मा देखिएको डेंगुको सेरोटाईप–२ भन्दा फरक सेरोटाईप (१ वा ३ वा ४) अहिले देखिदै गरेको डेंगुले संक्रमितलाई दोश्रो पटक संक्रमण गरेको रहेछ भने सो व्यक्तिमा डेंगु कडा हुन सक्ने अनुमान गरिएको छ ।