नेपाल बक्सअफिस : ‘भेनम’ र ‘जेम्स बन्ड’को कमाइ आशालाग्दो, अबको नजर ‘सूर्यवंशी’मा

काठमाडौं । दशैंपछिको नेपाली बक्सअफिस सन्तोषजनक देखिएको छ । ५० प्रतिशत अकुपेन्सीमै प्रदर्शनमा आएका फिल्मले आशालाग्दो व्यापार गरेका छन् । सबैको नजर शुक्रबार रिलिज तयारीमा रहेको ‘सूर्यवंशी’मा सोझिएको छ ।

टम हार्डी स्टारर फिल्म ‘भेनम : लेट देयर बी कार्नेज’ले पाँच दिनमा ४७ लाख ग्रस कारोबार गरेको छ । एप्पल इन्टरटेनमेन्टका अनुसार तिहार बिदामा पनि यो फिल्मले स्थिर व्यापारलाई निरन्तरता दिन सक्छ ।

आगामी शुक्रबार प्रदर्शनम आउने बलिउडको प्रतीक्षित सूर्यवंशी चुनौति हुनसक्ने भएपनि भेनमको व्यापारमा गिरावटमा नआउने आशा हल संचालकले लिएका छन् । ‘हामीलाई त्यति सारो फरक पर्छ जस्तो लाग्दैन’ एप्पलका रुबेन श्रेष्ठले नेपाल प्रेसलाई भने ।

टी-फोक पिक्चर्सले वितरण गरेको तिमोथी चालार्मेट स्टारर साइन्स फिक्सन फिल्म ‘ड्युन’ले पनि सन्तोषजनक व्यापार गरेको छ ।

दशैं फूलपातिमा प्रदर्शनमा आएको जेम्स बन्ड फिल्मले हिजो मंगलबारसम्म नेपाली बक्सअफिसमा ५० लाख ग्रसको विन्दू पार गरेको जनाइएको छ । फास्ट एन्ड फ्युरियसको नवौं श्रृंखला (एफ–नाइन)ले ३५ देखि ४० लाखसम्मको ग्रस कमाइ गरेको छ ।

नेपाली फिल्म ‘डाँडाको वरपीपल’ फ्लप भएपछि नेपाली फिल्मको वर्तमान व्यापार अस्तित्व हलिउड फिल्मले धानिरहेका छन् । शुक्रबार मार्भल स्टूडियोको सुपरहिरो फिल्म ‘सान्ची’ प्रदर्शन हुनेछ । शुक्रबार नै नेपालको ‘धुम-४ ‘ पनि रिलिज हुनेछ ।