कोप-२६ सम्मेलनमा पाँच नेपाली फिल्म देखाइने

काठमाडौं । जलवायु परिवर्तनको विषयमा निर्माण भएका पाँच नेपाली फिल्मलाई स्कटल्यान्डको ग्लास्गोमा सुरु विश्व जलवायु सम्मेलन (कोप-२६)मा प्रदर्शन गरिने भएको छ ।

सोमबार चलचित्र विकास बोर्डमा आयोजित कार्यक्रममा पाँचवटा फिल्म घोषणा गर्दै फिल्म निर्मातालाई पुरस्कृत गरियो । मुलुकभरबाट प्राप्त ५० वटा फिल्ममध्ये १५ वटा छनौट गरिएको थियो । छनौट फिल्मबाट उत्कृष्ट पाँच घोषणा भएको हो ।

मदरल्यान्ड इङलिस बोर्डिङ स्कुल अर्घाखाँचीले निर्माण गरेको फिल्म ‘एक कृषकका एक पाइला’ सबैभन्दा रुचाइएको फिल्म बनेको छ । समता स्कुलको फिल्म ‘प्लास्टिकलाई नाइँ भनौं’ दर्शकमाथिको प्रभाव पुरस्कारबाट पुरस्कृत भएको छ ।

अपारजिताले निर्माण गरेको फिल्म ‘कम भविष्य’ निर्माण भएको मध्ये सर्वोत्कृष्ट फिल्म घोषित भएको छ । धो धारापस्थित क्रिस्टल माउन्टेन स्कुलले निर्माण गरेको ‘हिमालयमा जलवायु परिवर्तन’ फिल्मले जलवायु परिवर्तत पुरस्कार पाएको छ ।

अनन्य खड्का निर्देशित फिल्म ‘म हनुमन्ते हुँ’ नौली शैलीका लागि पुरस्कृत भएको छ । ब्रिटिस काउन्सिल र बोर्डले ‘क्यामेरा सिक’ कार्यक्रम अन्तर्गत १८ वर्ष मुनिका फिल्म निर्माताबाट फिल्म आवेदन मागेका थिए ।

निर्णायक समूहले जलवायु परिवर्तनबारे फिल्म बनाउन १० किशोर छनौट गरेको थियो । उत्कृष्ट हुनेलाई डेढलाख रुपैयाँले पुरस्कृत गरिएको छ । ब्रिटिस काउन्सिल नेपालकी निर्देशक शहीदा म्याकडुगलले किशोर र युवापुस्ता भविष्य भएकाले उनीहरुलाई जलवायु परिवर्तनबारे आवाज उठाउन मंच प्रदान गरिएको बताइन् । चलचित्र विकास बोर्डका अध्यक्ष दयाराम दाहालले नेपाली विद्यार्थीले बनाएका फिल्मलाई जलवायु सम्मेलनमा देखाइनु महत्वपूर्ण कुरा भएको बताए ।