पहिलो दोहोरी च्याम्पियनको उपाधि प्रकाश र मीनाको टीमलाई : शोभा-बालचन्द्रको समूह दोस्रो बन्यो

पोखरा । नेपालको पहिलो दोहोरी च्याम्पियनको उपाधि प्रकाश पराजुली र मीना बुढाथोकीले जितेका छन् । तालनगरी पोखरामा आज साँझ भएको ग्रान्ड फिनालीमा प्रकाश र मीनाको जोडी च्याम्पियन बनेको हो ।

पोखरास्थित बाराहीघाटमा हजारौं दर्शकबीच भएको कार्यक्रममा विजेता समूहले नगद २० लाख रुपैयाँ साथमा १ करोड रुपैयाँ बराबरको जीवन बिमा पुरस्कार पाएको छ ।

शोभा कार्की र बालचन्द्र बरालको समूह दोस्रो भएको छ। उपविजेता समूहले नगद १० लाख रुपैयाँ तथा ५० लाख रुपैयाँ बराबरको जीवन बिमा पुरस्कार पाएको छ । विजेता र उपविजेतालाई गण्डकी प्रदेशका मुख्यमन्त्री कृष्णचन्द्र नेपाली पोखरेलले पुरस्कार प्रदान गरे ।

कि एड्भटाइजिङ प्रालिको प्रायोजनमा नेपाल टेलिभिजनले नेपालको पहिलो दोहोरी च्याम्पियन रियालिटी शो सञ्चालन गरेको हो । कार्यक्रममा नेपाल टेलिभिजनका महाप्रबन्धक फूलमान वल तामाङले ‘दोहोरी च्याम्पियन– २’ सञ्चालन गर्ने घोषणा गरे ।