नेपाल छायांकन सकेर बलिउड टोली मुम्बइ फर्कियो, निर्देशक वर्जत्य केही दिन काठमाडौंमा रहने

काठमाडौं । भारतीय फिल्म ‘उचाइ’को नेपाल छायांकन सकिएपछि कलाकारहरु आज स्वदेश फर्किएका छन् ।

फिल्मको पहिलो सेड्युलअन्तर्गत मनाङ, लुक्ला, नाम्चे र काठमाडौंको छायांकन सकिएको नेपाल व्यवस्थापन हेरेको थ्री ह्विलर्स कम्पनीले जानकारी दिएको छ ।

बिहीबार हिमालपारिको जिल्ला मनाङमा फिल्मको पहिलो सेड्युल सकिएको थियो । शुक्रबार कलाकार, प्राविधिकसहितको निर्माण टोली काठमाडौं आइपुगेको थियो ।

अभिनेताहरु अनुपम खेर, बोमन इरानी, परिणिती चोपडासहित फिल्मका अन्य कलाकार शनिबार दिउँसो अपरान्ह मुम्बइ फर्किएको जनाइएको छ । निर्देशक सुरज वर्जत्य चाहिँ अझै केही दिन काठमाडौंमा रहनेछन् ।

दसैँअघि काठमाडौं आइपुगेको उचाइ युनिटले निर्धारित समयभन्दा पहिला नै छायांकन समापन गरेको छ । बाँकी छायांकन भारतमै हुने र त्यहाँ अमिताभ बच्चन र डेनी डेनजोङ्पाले पनि भाग लिने जनाइएको छ । नेपालको हिमाली थलोमा पुगेर फिल्मका कलाकारले लगातार आफ्ना सामाजिक संजालमा तस्बिर तथा भिडिओ पोस्ट गरिरहेका थिए ।