शुक्रबार थप ५४९ जनामा कोरोना संक्रमण, ६ जनाको मृत्यु

काठमाडौं । पछिल्लो २४ घण्टामा देशभर ५४९ जना कोरोनाभाइरस संक्रमित थपिएका छन् । स्वास्थ्य मन्त्रालयका अनुसार ९ हजार ७४६ वटा नमूना (पीसीआर ७१४५ र एन्टीजेन २६०१) परीक्षण गर्दा ती संक्रमित थपिएका हुन् ।

सोही अवधिमा ५६९ जना संक्रमणमुक्त भएका छन् भने ६ जनाको मृत्यु भएको छ । गत २४ घण्टामा १ लाख २५ हजार ५२७ जनाले कोरोनाभाइरसविरुद्धको खोप लगाएका छन् ।

दैनिक कोरोनाभाइरस संक्रमणदर ५.६ प्रतिशत रहेको मन्त्रालयले जनाएको छ । निको हुनेको दर ९७.३ प्रतिशत छ भने १.४ प्रतिशत मृत्युदर छ ।

काठमाडौं, भक्तपुर, ललितपुर र कास्कीमा ५०० भन्दा बढी कोरोना संक्रमित छन् । यस्तै ९ जिल्लामा २०० भन्दा बढी संक्रमित छन् । मुगुमा संक्रमितको संख्या शून्य छ ।

अहिलेसम्म देशभर सक्रिय संक्रमितको संक्रमितको संख्या १० हजार १५१ छ ।

स्वास्थ्य मन्त्रालयका अनुसार अहिलेसम्म ८ लाख भन्दा बढीमा कोरोना संक्रमण पुष्टि भएको छ भने हालसम्म ७ लाख भन्दा बढी कोरोनामुक्त भएका छन् । कोरोनाबाट मृत्यु हुनेको कुल संख्या ११ हजार ३८८ पुगेको छ ।