रुपन्देही उद्योग संघको नेतृत्वमा पौडेल निर्विरोध, महासचिवमा खत्री र खनालबीच प्रतिस्पर्धा

रूपन्देही । रुपन्देही उद्योग संघको अध्यक्षमा माधव पौडेल निर्विरोध निर्वाचित भएका छन्। तर, महासंघको महासचिवका लागि भने निर्वाचन हुने संकेत देखिएको छ।

निर्वाचन आयोगका अनुसार महासचिवमा हरि बहादुर खत्री र माया खनालको उम्मेदवारी परेको छ । त्यस्तै सचिव पदमा वसन्त ढकाल र यमलाल भट्टराईको उम्मेदवारी परेको छ।

खत्री वर्तमान कार्यसमितिमा कोषाध्यक्ष थिए भने खनाल महिला सचिवको जिम्मेवारीमा थिइन्। त्यसैगरी ढकाल र भट्टराई दुवै कार्यसमिति सदस्य हुन्।

संघको निर्वाचन तालिकाअनुसार उम्मेदवारी मनोनयनको अन्तिम समयसम्म अध्यक्षलगायतका अधिकांश पदहरुमा एकल उम्मेदवारी परेको निर्वाचन आयोगले जनाएको छ।

निर्वाचन आयोगका अनुसार वरिष्ठ उपाध्यक्ष पदमा दिलिप सापकोटा, प्रथम उपाध्यक्ष पदमा कृष्णप्रसाद पराजुली र द्वितीय  उपाध्यक्षमा जीवकान्त काफ्लेको एकल उम्मेदवारी परेको छ।

त्यसैगरी महिला सचिवमा मन्जु भुसाल र सहकोषाध्यक्ष पदमा सुरेन्द्र ज्ञवालीको मात्र उम्मेदवारी परेको छ।

यसका साथै आजीवन सदस्यतर्फ माधव नेपाल, संस्थागत सदस्यतर्फ अशोक कुंवर, महिला सदस्यतर्फ शारदा भटराई र मिना थापा, बुटवल औद्योगिक क्षेत्रबाट कमल ज्ञवालीको मात्रै एकल उम्मेदवारी परेका छन।

त्यसैगरी ८ जना खुल्ला सदस्यका लागि ८ जनाको मात्रै उम्मेदवारी परेको छ । खुल्ला सदस्यहरुमा प्रेम आले, लाल प्रसाद बस्याल, राजु घिमिरे, बल बहादुर गोदार, चन्द्रकान्त खनाल, गोबिन्द भुसाल, लाल बहादुर थापा र नेत्र रुचालले उम्मेदवारी दिएका छन् भने बुटवल उपमहानगर पालिकाबाट लालहरी पाण्डे र जमुना पोखरेल, तिलोत्तमा नगरपालिकाबाट विशाल बेल्वासेले उम्मेदवारी दिएका छन्।

संघमा नेकपा एसबाहेकका दलनिकट उद्योगीहरूको साझा प्यानल बनेको छ ।

उद्योग संघको ४३ औ साधारणसभा तथा २२ औ अधिवेशनका सन्दर्भमा संघको आगामी नेतृत्वका लागि असोज २१ गते उम्मेदवारी मनोनयनको तालिका रहेको थियो।